ގުޅިގަޅުގައި ބާކީ ނުހިއްކާ އޮތް ބައި ވަރަށް އަވަހަށް ހިއްކާނެ ކަމަށް ހައުސިން މިނިސްޓަރު ޑރ. އަލީ ހައިދަރު ރޭ ވިދާޅުވެއްޖެއެވެ.

މިނިސްޓަރ މިހެން ވިދާޅުވީ ވަރަށް އަވަހަށް ގުޅިފަޅު ބިން ހިއްކަން ފެށޭނެ ކަމަށާއި މީހުންނަށް ލިބުނު ގޯތިތައް ހަވާލުކުރެވޭނީ އެތަން ހިއްކާ ނިމުމުންކަމަށް މިނިސްޓަރު ފާހަގަ ކުރެއްވިއެވެ.

"އަދި ނެތް ގުޅިފަޅުން ގޯތިތައް ހަވާލުކުރެވޭކަށް. އެކަމަކު މިހާރު އެ ހުރީ ގޯތި ލިބޭނެ ތަން ކަނޑައަޅައި ގުރުއަތުލާ ނިންމާފައި. ގުޅިފަޅުގައި ވެސް އެބަ އޮތް ހިއްކަން ޖެހޭ ސަރަހައްދެއް، އެންމެ ފުން ސަރަހައްދު. އެ މަސައްކަތް ވަރަށް އަވަހަށް ފެށިގެންދާނެ،" ހައިދަރު ވިދާޅުވި އެވެ.

ރައީސް ޑރ. މުހައްމަދު މުއިއްޒު ގުޅިފަޅުން އަދި އިތުރު 85 ހެކްޓަރުގެ ބިން ހިއްކަން ނިންމަވައިފައިވާއިރު ކުރީ ސަރުކާރުން ވަނީ ނެދަލޭންޑްސްގެ ބޮސްކާލިސް ކުންފުންޏާ ހަވާލުކޮށްގެން 150 ހެކްޓަރުގެ ބިން ހިއްކައިފައެވެ.

ގުޅިފަޅު މަތިން ނަގާފައިވާ ފޮޓޯއެއް

އެމްޓީސީސީއާ ހަވާލުކޮށްގެން ގުޅިފަޅުން އިތުރަށް ހިއްކަން ނިންމާފައިވާ 85 ހެކްޓަރުގެ ބިން ހިއްކުން ލަސްވަނީ އެކަމަށް ބޭނުންވާ ފައިސާ ހަމަނުޖެހޭތީ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވަނީ މިދިޔަ މަހު ވިދާޅުވެފައި އެވެ.

މި ސަރަހައްދުން ހުޅުމާލެ އާއި ގުޅިފަޅު އަދި ގިރާވަރުފަޅު ހިމެނޭ ގޮތަށް މާލޭ މީހުންނަށް 9،000 އަށް ވުރެ ގިނަ ގޯތި ދޫކުރަން ކުރީގެ ސަރުކާރުން އޮތީ ނިންމައިފައެވެ. އަދި ލޭންޑް ޔޫސް ޕްލޭނަށް ގެނައި ބަދަލާ އެކު، މި ސަރުކާރުންވަނީ ގުޅިފަޅުން އިތުރު 3،520 ގޯތި ދޫކުރަން ނިންމައިފައެވެ.