އޭއެފްސީ ޗެމްޕިއަންސް ލީގު އެލީޓްގެ ދެވަނަ ބުރުގެ ފުރަތަމަ ލެގުގައި ޕޯޗުގަލްގެ ތަރި، ކްރިސްޓިއާނޯ ރޮނާލްޑޯ ނުލައި ސަޢޫދީ ޢަރަބިއްޔާގެ އަލް-ނަސްރުން އީރާނުގެ އިސްތިގުލާލްއާ ދެކޮޅަށް ކުޅުނު މެޗު ލަނޑެއް ނުޖެހި އެއްވަރުވެއްޖެއެވެ.

އީރާނުގައި ކުޅުނު މި މެޗުގައި އަލް ނަސްރުން އެންމެ ފަހުން ގެނައި ކޮލަމްބިއާ ފޯވާޑް، ޖޮން ޑުރާން އަށް ލަނޑުޖަހަން ލިބުނު ފުރުޞަތު ނަގާލާފައިވާއިރު، ލިވަޕޫލްގެ ކުރީގެ ފޯވާޑް، ސަޑިއޯ މާނޭ އަށް ލިބުނު ފުރުޞަތުގެ ވެސް ބޭނުމެއް ނުހިފުނެވެ.

މި މެޗުގައި އިސްތިގުލާލުގެ ގޯލްކީޕަރު، ސައްޔިދު ހުސައިން ހުސެއިނީ ވަނީ ގިނަ ސޭވްތަކެއްކޮށް، މޮޅު ކުޅުމެއް ދައްކާފައެވެ.

މެޗަށްފަހު ވާހަކަދައްކަމުން އަލް ނަސްރުގެ ކޯޗު، ސްޓެފާނޯ ޕިއޯލީ ބުނީ، ކުޅުންެތެރިންގެ ފަރާތުން ފެނުނު ކުޅުމާ މެދު ހިތްހަމަޖެހޭ ކަމަށެވެ. އަދި، ބާކީ އެއް މެޗު އެބައޮތްކަން ހަނދާން ބަހައްޓަންޖެހޭ ކަމަށް ވެސް ޕިއޯލީގެ ވާހަކައިގައި ވަނީ ފާހަގަކޮށްފައެވެ.

މި ދެ ޓީމުގެ މެދުގައި ކުޅުމަށް ހަމަޖެހިފައިވާ ދެވަނަ ލެގުގެ މެޗު މި މަހުގެ 11 ވަނަ ދުވަހު އޮންނާނީ ރިޔާދުގައެވެ. މި މެޗު ކާމިޔާބުކުރާ ޓީމަކަށް މުބާރާތުގެ ކުއާޓާ ފައިނަލުން ޖާގަ ލިބޭނެ އެވެ.