ގެއަށް މެހުމާނުން އައިސް، އެމީހުންގެ ތެރެއިން މީހަކު ވައިފައި ޕާސްވޯޑް ދޭން ބުނާ ވަގުތު ގިނަފަހަރަށް ޕާސްވޯޑް ހަނދާނަކަށް ނާދެއެވެ. ކުއްލިއަކަށް ޕާސްވޯޑް ހަނދާން ނެތެއެވެ. ނަމަވެސް ކަންބޮޑުވާކަށް ނުޖެހެއެވެ. މިއީ ހަނދާން ނެތިފައިވާ ވައިފައި ޕާސްވޯޑެއް ވައިފައިއާ ގުޅިފައިވާ ޑިވައިސްއަކުން އަވަހަށް އަދި ފަސޭހައިން ހޯދާނެ ބައެއް ގޮތްތަކެވެ.

ވައިފައި ޕާސްވޯޑް ބަދަލުކޮށްފައިވާނަމަ މި ފިޔަވަޅުތަކުން މާބޮޑު އެހީއެއް ނުލިބޭނެއެވެ. އެފަދަ ހާލަތެއްގައި، އެންމެ ފުރަތަމަ އެ ބަދަލުކުރި ފަރާތަކުން އައު ޕާސްވޯޑް އަހަން ޖެހޭނެއެވެ.

އެންޑްރޮއިޑް

ގޫގުލް ޕިކްސެލް ފޯނެއް ގެންގުޅޭނަމަ، ސެޓިންގްސް އަށް ގޮއްސަ ، ނެޓްވޯކް ނެގުމަށްފަހު އިންޓަނެޓް އަށް ދާށެވެ. ދެން،  ފޯނު ގުޅިފައިވާ ވައިފައި ނެޓްވޯކްގެ ނަމާ ޖެހިގެން އިންނަ ގިއަރ އައިކަން އަށް ފިތާލާށެވެ. މިއިން އެހެން ސްކްރީނަކަށް ދާނެއެވެ. ޝެއަރ އަށް ފިތާލާފައި، އައިޑެންޓިޓީ ޔަގީންކޮށްދިނުމުން، ލޮގިން މަޢުލޫމާތު ހިއްސާކުރުމަށް ކިއުއާރު ކޯޑެއް ފެންނާނެއެވެ. މީގެ ތެރޭގައި ވައިފައި ޕާސްވޯޑްވެސް ހިމެނޭނެއެވެ.

ސެމްސަންގް ގެލެކްސީގެ ވެރިންނަށް މި ޕްރޮސެސް ތަންކޮޅެއް ތަފާތެވެ. ސެޓިންގްސް އަަށް ގޮސް ކަނެކްޝަންސް ނެގުމަށްފަހު ވައިފައި އަށް ދާށެވެ. ގުޅިފައިވާ ވައިފައި ނެޓްވޯކާ ޖެހިގެން އިންނަ ގިއަރު އައިކަން އަށް ފިތާލާށެވެ. ދެން، ތަރިތަކުން ހާމަކޮށްފައިވާ ޕާސްވޯޑް ފީލްޑާ ޖެހިގެން އިންނަ ލޮލުގެ އައިކަން އަށް ފިތާލާފައި އައިޑެންޓިޓީ ޔަގީންކޮށްދޭށެވެ. މިއިން ވައިފައި ޕާސްވޯޑް ސާފުކޮށް ފެންނާނެއެވެ.

މިފަދަ ވައިފައި ކޮންފިގަރޭޝަން ޕޭޖުތައް އެހެން ކޮންމެ އެންޑްރޮއިޑް ފޯނަކުންވެސް ބެލޭނެއެވެ. ބައެއް ހާލަތްތަކުގައި ޑިވައިސް އަމިއްލައަށް ވައިފައި ނެޓްވޯކަށް އަލުން ގުޅޭގޮތަށް ހެދުންވެސް މުހިންމެވެ.

އައިއޯއެސް

އައިފޯނުތަކަށް، މި ޕްރޮސެސް ވަރަށް ފަސޭހައެވެ. މައި ސެޓިންގްސް އެޕަށް ދާށެވެ. ވައިފައި އަށް ފިތާލާފައި  ޑިވައިސް ގުޅިފައިވާ ނެޓްވޯކާ ޖެހިގެން ހުންނަ ނޫކުލައިގެ ވަށިގަނޑެއްގެ ތެރޭގައިވާ i އަށް ފިތާ ލާށެވެ. ޕާސްވޯޑް އަށް ފިތާލާށެވެ.  އައިފޯން ޕާސްކޯޑު ނުވަތަ ފޭސް އައިޑީ ބޭނުންކޮށްގެން އަމިއްލަ ފޯނުކަން ޔަގީންކޮށްދިނުމަށް އެދޭނެއެވެ. މި ޕިން ނަންބަރު ޖެހުމުން ނުވަތަ ފޯނު މޫނާ ދިމާލަށް ހިފެހެއްޓުމުން ޕާސްވޯޑް ފެންނާނެއެވެ.

ވިންޑޯސް

ގުޅިފައިވާ ވިންޑޯސް ލެޕްޓޮޕް ނުވަތަ ޕީސީއަކުން ވައިފައި ޕާސްވޯޑް ހޯދުމަށް، ސެޓިންގްސް އަށްދާށެވެ. ސްޓާޓް މެނޫ ނެޓްވޯކް އެންޑް އިންޓަނެޓް ގެ ވައިފައި އަށް ދާށެވެ.  ޑިވައިސް ގުޅިފައިވާ ނެޓްވޯކްގެ ނަން މަތީގައި ފެންނާނެއެވެ. އެ ނަމަށް ފިތާލުމުން ވައިފައި ނެޓްވޯކްގެ ޕްރޮޕަޓީސް ފެންނާނެއެވެ.