ENGLISH

04 އޭޕްރީލު 2025

Advertisement

ޕެނަލްޓީ ޖަހައިގެން ޔުނައިޓެޑް ކަޓުވާލުމަށް ފަހު ފުލަމް ކުއާޓާ އަށް

03 މާރިޗު 2025

|

މުޙައްމަދު އަދުހަމް

މެޗަށް ފަހު ފުލަމްގެ ކުޅުންތެރިން އުފާ ފާޅުކުރަނީ. --ފޮޓޯ: ރޮއިޓާސް

އިނގިރޭސި އެފްއޭ ކަޕްގެ ފަސްވަނަ ބުރުގައި ރޭ ކުޅުނު މެޗުގައި ޕެނަލްޓީ ޖަހައިގެން މެންޗެސްޓަރ ޔުނައިޓެޑް 4-3 އިން ބަލިކޮށް، ފުލަމް އެ މުބާރާތުގެ ކުއާޓާރ ފައިނަލަށް ދަތުރުކޮށްފިއެވެ.

އޯލްޑް ޓްރެފޯޑްގައި ކުޅުނު މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި ފުލަމް އަށް ލީޑު ނަގައިދިނީ ނައިޖީރިއާ ޑިފެންޑަރު، ކެލްވިން ބަސީ އެވެ.

ޔުނައިޓެޑުން އެއްވަރުކުރީ، 71 ވަނަ މިނެޓުގައި އެ ޓީމުގެ ކެޕްޓަން، ބްރޫނޯ ފެނާންޑޭސް ކާމިޔާބުކުރި ގޯލުންނެވެ.

މި ނަތީޖާގައި އޮވެ، މެޗުގެ ފުރިހަމަ ވަގުތު ހަމަވުމުން ދެން ކުޅުނު އިތުރު ވަގުތުގެ 15 މިނެޓުގެ ދެ ހާފުގައި ވެސް ދެ ޓީމަށް އިތުރު ގޯލެއް ކާމިޔާބުކުރެވޭ ގޮތް ނުވުމުން ދެން ޖެހުނީ ޕެނަލްޓީ ޖަހާށެވެ.

ޕެނަލްޓީ ޝޫޓްއައުޓްގައި ފުލަމް އިން ފޮނުވާލި ހަތަރު ޕެނަލްޓީ ވެސް ކާމިޔާބުކުރިއެވެ. އެ ޓީމަށް ޕެނަލްޓީ ކާމިޔާބުކޮށްދިނީ ރައުލް ހިމެނޭޒް، ސެންޑަ ބާޖް، ވިލިއަން އާއި އެންޓޮނީ ރޮބިންސަން އެވެ.

ޔުނައިޓެޑުން ފޮނުވާލި ފަސް ޕެނަލްޓީގެ ތެރެއިން ކާމިޔާބުކުރެވުނީ އެންމެ ތިން ޕެނަލްޓީ އެވެ. އެއީ، ފެނާންޑޭސް، ޑިއޯގޯ ޑަލޮޓް އާއި ކަސެމީރޯގެ ޕެނަލްޓީއެވެ. އެ ޓީމަށް ނާކާމިޔާބުވީ ވިކްޓޯ ލިންޑެލޯފް އާއި ޖޯޝުއާ ޒާކްޒީގެ ޕެނަލްޓީ އެވެ. މި ދެ ޕެނަލްޓީ ވެސް ފުލަމްގެ ކީޕަރު، ބާންޑް ލެނޯ ވަނީ މަތަކޮށްފައެވެ.

މުބާރާތުގައި ރޭ ކުޅުނު އަނެއް މެޗުގައި އިތުރު ވަގުތުގެ ކުޅުމަށްފަހު ބްރައިޓަން ވަނީ 2-1 އިން ނިއުކާސަލް ޔުނައިޓެޑް ބަލިކޮށްފައެވެ.

ކިޔުންތެރިންގެ ހިޔާލު