އިޓާލިއަން ލީގުގައި ރޭ ކުޅުނު މެޗުގައި ލާޒިއޯ އަތުން 2-1 އިން ބަލިވެ، އޭސީ މިލާނަށް އިތުރު މައްސަލަތައް ކުރިމަތިވެއްޖެއެވެ.

މިއީ ލީގުގައި އެންމެ ފަހުން ކުޅުނު ތިން މެޗުގެ ތެރެއިން މިލާން ބަލިވި ތިންވަނަ ފަހަރެވެ. އެ ޓީމު ފޯމު ދަށްވެ، ޔުއެފާ ޗެމްޕިއަންސް ލީގުން ވެސް ވަނީ ކަޓައިފައެވެ.

މިލާންގެ ދަނޑުގައި ކުޅުނު މެޗުގެ ފުރަތަމަ ހާފުގައި ލާޒިއޯ އިން ލީޑު ނެގީ މަޓިއާ ޒަކާނީ އެވެ.

ދެވަނަ ހާފުގެ މެދަކާ ހިސާބުން މިލާންގެ ޑިފެންޑަރު، ސްޓްރަހިންޔާ ޕަވްލޮވިޗަށް ރަތް ކާޑު ދެއްކުމުން އެ ޓިމަށް މައްސަލަތައް ކުރިމަތިވިއެވެ.

މެޗުގެ ފަހު ދިހަ މިނެޓުގެ ތެރޭގައި މިލާނުން އެއްވަރުކުރީ ސެމުއެލް ޗުކްވުއެޒޭގެ ގޯލުންނެވެ.

ލާޒިއޯ މޮޅުވީ، އިތުރު ވަގުތުގެ ތެރޭގައި ލިބުނު ޕެނަލްޓީއަކުން ޕެޑްރޯ ރޮޑްރިގޭޒް ވައްދާލި ލަނޑުންނެވެ.

މި ނަތީޖާއާ އެކު، މިލާން ވަނީ ނުވަވަނަ އަށް ވެއްޓިފައެވެ. އެ ޓީމަށް 27 މެޗުން ލިބިފައިވަނީ 41 ޕޮއިންޓެވެ. މި މޮޅާއެކު، ލާޒިއޯ ވަނީ ހަތަރު ވަނައަށް ކުރިއަށް ޖެހިލައިފައެވެ.