އައިސީސީ ޗެމްޕިއަންސް ޓްރޮފީ މުބާރާތުގައި މިއަދު ކުޅުނު މެޗުގައި ނިއު ޒީލަންޑް 44 ލަނޑުން ބަލިކޮށް، އިންޑިއާ އިން ގްރޫޕް އޭ ގެ އެއްވަނަ މަގާމު ހޯދައިފިއެވެ.

މި މޮޅާއެކު، އިންޑިއާ ވަނީ ކުޅުނު ތިން މެޗުން ސައްތައިން ސައްތައިގެ ރެކޯޑެއް ހޯދައިފައެވެ. ނިއު ޒީލަންޑަށް ދެވަނަ ލިބުނީ، ދެ މެޗުން ހޯދި ހަތަރު ޕޮއިންޓާއެކު އެވެ.

ދުބާއީ އިންޓަރނޭޝަނަލް ކްރިކެޓް ސްޓޭޑިއަމްގައި ކުޅުނު މެޗުގެ ޓޮސް ދިމާވުމުން ނިއު ޒީލަންޑުން ގަސްދުކުރީ ހޮވަން އަރާށެވެ. 

އިންޑިއާ އިން ކުޅެން އަރައި، 50 އޯވަރުގެ ތެރޭގައި ނުވަ ވިކެޓަށް 249 ލަނޑުހެދިއެވެ. އެންމެ ރަނގަޅަށް ކުޅުނީ 79 ލަނޑުހެދި ޝްރެޔާސް އައްޔަރު އެވެ. މި އިނިންގްސްގައި ނިއު ޒީލަންޑްގެ މެޓް ހެންރީ ވަނީ ފަސް ވިކެޓްނަގައިފައެވެ.

ރައްދުގައި ކުޅެން އަރައި، 45.3 އޯވަރުގެ ތެރޭގައި ނިއު ޒީލަންޑްގެ ހުރިހާ ކުޅުންތެރިން ނުބައިވީ 205 ލަނޑަށެވެ. އެ ޓީމުން އެންމެ ރަނގަޅަށް ކުޅުނީ 81 ލަނޑުހެދި ކޭން ވިލިއަމްސަން އެވެ. އިންޑިއާ އިން އެންމެ ރަނގަޅަށް އުކީ ވަރުން ޗަކްރަވާތީ އެވެ. ވަރުން ޗަކްރަވާތީ ވަނީ ފަސް ވިކެޓްނަގައިފައެވެ. މި މެޗުގެ މޮޅު ކުޅުންތެރިއަކަށް ހޮވުނީ ވެސް އޭނާ އެވެ.

މުބާރާތުގެ ސެމީ ފައިނަލުގެ ފުރަތަމަ މެޗުގައި އަންނަ އަންގާރަ ދުވަހު އިންޑިއާ ނިކުންނާނީ އޮސްޓްރޭލިއާ އާ ދެކޮޅަށެވެ. ދެވަނަ ސެމީގައި ބުދަ ދުވަހު ނިއު ޒީލަންޑް ބައްދަލުކުރާނީ ދެކުނު އެފްރިކާ އާ އެވެ.