ސްޕެނިޝް ލީގުގައި ރޭ ކުޅުނު މެޗުތަކުން ރެއާލް މެޑްރިޑް ބަލިވިއިރު، އެތުލެޓިކޯ މެޑްރިޑް މޮޅުވެ ތާވަލްގެ އެއްވަނަ އަށް ޖެހިލައިފިއެވެ.

ރަށުން ބޭރުގައި ރެއާލް ބެޓިސް އަތުން 2-1 އިން ރެއާލް ވަނީ ބަލިވެފައެވެ. އެތުލެޓިކް ބިލްބާއޯ އަތުން އެތުލެޓިކޯ މޮޅުވީ 1-0 އިންނެވެ.

މި ނަތީޖާއާ އެކު، އެތުލެޓިކޯ އެއްވަނައިގައި އުޅެނީ 26 މެޗުން 56 ޕޮއިންޓް ހަމަކޮށްގެންނެވެ. އެއް މެޗު މަދުން ކުޅެގެން ދެވަނައިގައި އޮތް ބާސެލޯނާ އަށް 54 ޕޮއިންޓް ލިބިފައިވާއިރު، ހަމަ މި އަދަދަށް ޕޮއިންޓް ލިބިގެން ލަނޑުގެ ތަފާތުން ތިންވަނައިގައި އޮތީ ރެއާލެވެ.

ބެޓިސްގެ ދަނޑުގައި ކުޅުނު މެޗުގެ ކުރީކޮޅު ރެއާލުން ލީޑު ނެގީ ބްރާހިމް ޑިއާޒް އެވެ.

ފުރަތަމަ ހާފު ނިމުމުގެކުރީން، ބެޓިސް އަށް އެއްވަރުކޮށްދިނީ ޖޮނީ ކާޑޯސޯ އެވެ.

މި މެޗުން ބެޓިސް މޮޅުވި ލަނޑު، ފަހު ހާފުގެ ކުރީކޮޅު ލިބުނު ޕެނަލްޓީއަކުން ކާމިޔާބުކޮށްދިނީ އިސްކޯ އެވެ.

އެތުލެޓިކޯގެ ދަނޑުގައި އެ ޓީމު ކުޅުނު މެޗުގައި މޮޅުވި ލަނޑު ޖަހައިދިނީ އާޖެންޓީނާ ފޯވާޑް، ހޫލިއަން އަލްވަރޭޒް އެވެ.