އެންބީއޭގައި މިއަދު ކުޅުނު މެޗުގައި ލޮސް އެންޖެލިސް އަށް ނިސްބަތްވާ ދެ ޓީމުގެ ކުރިމަތިލުމުގައި ލޮސް އެންޖެލިސް ލޭކާސް އިން ކާމިޔާބުކޮށްފިއެވެ.

ވާދަވެރި ލޮސް އެންޖެލިސް ކްލިޕަރސް އަތުން ލޭކާސް މޮޅުވީ 106-102 އިންނެވެ.

ލޭކާސްގެ ކްރިޕްޓޯ.ކޮމް އެރީނާގައި ކުޅުނު މެޗު ފެށިގެން ފުރަތަމަ ކުއާޓާގައި 25-24 އިން ކްލިޕަރސް ކުރިހޯދިއެވެ. އެކަމަކު، ދެވަނަ ކުއާޓާގައި ލޭކާސް އިން ވަނީ ހަ ޕޮއިންޓްގެ ލީޑެއް ނަގައި، 59-54 އިން ކުރީގައި އޮވެގެން ހާފު ނިންމާލައިފައެވެ.

ތިންވަނަ ކުއާޓާގައި ލޭކާސް އިން 24-23 އިން ކުރިހޯދިއިރު، ފަހު ކުއާޓާގައި ކްލިޕަރސް ވަނީ 25-23 އިން ލީޑު ކޮށްފައެވެ.

އެހެންނަމަވެސް، މެޗުގެ ދެވަނަ ކުއާޓާގައި ލޭކާސް އިން ދެއްކި މޮޅު ކުޅުމުގެ ސަބަބުންނާއި، އެ ޓީމުން ހުރިހާ ކުއާޓާއެއްގައި ކުޅުން އެއްވަރެއްގައި ހިފެހެއްޓުމުގެ ނަތީޖާއެއްގެ ގޮތުން މެޗު ކާމިޔާބުކުރީ ހަތަރު ޕޮއިންޓްގެ ފަރަގަކާއެކު އެވެ.

މި މެޗުން ލޭކާސް މޮޅުކޮށްދިނުމުގައި މުހިއްމު ރޯލެއް އަދާކުރީ ލެބްރޮން ޖޭމްސް އާއި ލޫކާ ޑޮންޗިޗް އެވެ. މީގެތެރެއިން، ޖޭމްސް ވަނީ 28 ޕޮއިންޓާއެކު 13 ރީބައުންޑް ނަގައި، ޑަބަލް-ޑަބަލްއެއް ފުރިހަމަކޮށްފައެވެ. ލޫކާ ވަނީ 31 ޕޮއިންޓް އެއްކޮށްފައެވެ.

ކްލިޕަރސް އަށް އެންމެ ގިނަ ޕޮއިންޓް އެއްކޮށްދިނީ އިވިޗާ ޒޫބާޗް އެވެ. އޭނާ ވަނީ 27 ޕޮއިންޓާއެކު 16 ރީބައުންޑްނަގައި، ޑަބަލް-ޑަބަލްއެއް ފުރިހަމަކޮށްފައެވެ. އެ ޓީމުން ދެން އެންމެ ރަނގަޅަށް ކުޅުނީ 21 ޕޮއިންޓް އެއްކުރި ކޯހީ ލެނާޑް އެވެ.