ތިމާވެށީގެ އެންމެ ބޮޑު ބައްދަލުވުން ކަމުގައިވާ "ކޮޕް 29" ގައި ބައިވެރިވެވަޑައިގަތުމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު ޠޯރިޤް އިބްރާހީމް އަޒަރުބައިޖާންގެ ވެރިރަށް ބާކޫއަށް ފުރާވަޑައިގެންފިއެވެ.

ވަޒީރު ޠާރިޤް އިބްރާހީމްގެ އަރިހުގައި އެ ވުޒާރާގެ އިސްވެރިންގެ ޓީމެއް ބައިވެރިވެވަޑައިގަންނަވައެވެ.

މިފަހަރުގެ ކޮޕް ސަމިޓުގައި ރާއްޖޭން މުހިންމު ދައުރެއް އަދާކުރާނެ ކަމަށް މީގެކުރިން ވަޒީރު ޠޯރިޤު ވަނީ ވިދާޅުވެފައެވެ. ކޮޕްގެ ހަވާސާގައި ހަތަރު އިވެންޓެއް ރާއްޖޭން އިންތިޒާމު ކުރުމަށް ވަނީ ހަމަޖެހިފައެވެ. އޭގެތެރޭގައި އޭޑީބީއާ ގުޅިގެން އިއާދަކުރަނިވި ހަކަތައާ ގުޅޭ އިވެންޓަކާއި، ކޮޕްގެ އެޓޯލްސް ނޭޝަންގެ ޗެއަރގެ ހައިސިއްޔަތުން ފަރުތައް ހިމާޔަތްކުރުމުގެ މުހިންމުކަމާ ގުޅޭގޮތުން "ސަސްޓެއިނަބަލް ކޮރަލް ރީފް މެނޭޖްމަންޓް" އަދި ކުދި ޖަޒީރާ ޤައުމުތަކުގެ ކްލައިމެޓް އެޑަޕްޓޭޝަން މިނިސްޓީރިއަލް ޗެމްޕިއަނެއްގެ ގޮތުގައި ހަރަކާތެއް ބޭއްވުން ހިމެނެއެވެ.

ކޮޕް ސަމިޓުގެ ކުރިން، ތިމާވެއްޓާ ގުޅޭ މައްސަލަތަކާއި ގުޅޭގޮތުން ޒުވާނުންގެ ޚިޔާލު ހޯދުމަށް ޚާއްސަ އިވެންޓެއް ވަނީ ކުރިއަށް ގެންގޮސްފައެވެ. އެ ޚިޔާލުތަކަށް ބިނާކޮށް، ކޮޕް 29 އަށް ގެންދިއުމަށް ރާއްޖޭގެ ޒުވާނުންގެ ފަރާތުން ޚާއްސަ ސްޓޭޓްމަންޓެއް ވަނީ ތައްޔާރުކޮށްފައެވެ.

ކޮޕް 29 ގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބައިވެރިވެވަޑައިގެން ތަޤުރީރު ކުރެއްވުމަށް ވަނީ ހަމަޖެހިފައެވެ. މޫސުމީ ބަދަލުތަކުން އަރައިގަތުމަށް ކުރާ ހޭދައަށް ބޭނުންވާ މާލީ އެހީ، ރާއްޖެ ފަދަ ޤައުމުތަކަށް ހޯދައިދިނުމަށް ރާއްޖޭން ދަނީ ކޮޕްގެ ބައްދަލުވުންތަކުގައި ވަކާލާތުކުރަމުންނެވެ.

މި އަހަރުގެ ކޮޕް ސަމިޓު ކުރިއަށްދާނީ މި މަހުގެ 11 އިން 22 ގެ ނިޔަލަށް އަޒަރުބައިޖަންގެ ވެރިރަށް ބާކޫގައެވެ. މި އަހަރު ކޮޕްގެ ޝިޢާރަކީ "އިން ސޮލިޑޭރިޓީ ފޯރ އަ ގްރީން ވޯލްޑް" އެވެ.

ކޮޕް ސަމިޓަކީ ދުނިޔެއަށް ކުރިމަތިވަމުންދާ ތިމާވެށީގެ މައްސަލަތަކާ ގުޅޭގޮތުން އދ.ގެ މެމްބަރު ޤައުމުތަކުން ބައިވެރިވާ އެންމެ ބޮޑު ސަމިޓެވެ.