އިނގިރޭސި އެފްއޭ ކަޕްގެ ފަސްވަނަ ބުރުގައި ރޭ ކާޑިފް ސިޓީ 2-0 އިން ބަލިކޮށް، އެސްޓަން ވިލާ އިން އެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މިއީ މިދިޔަ 10 ވަރަކަށް އަހަރުގެ ތެރޭގައި އެ ޓީމުން އެފްއޭ ކަޕްގެ ކުއާޓާ އިން ޖާގަ ހޯދި ފުރަތަމަ ފަހަރެވެ.

ވިލާ ޕާކުގައި އިނގިރޭސި ދެވަނަ ޑިވިޝަނުގެ ރެލިގޭޝަން ޒޯނުގައި އުޅޭ ކާޑިފްއާ ދެކޮޅަށް ކުޅުނު މެޗު ފެށިގެން ވިލާ އިން ޑޮމިނޭޭޓްކުރިއިރު، ފުރަތަމަ ހާފުގައި އެ ޓީމުގެ އެޓޭކުތައް ހުއްޓުވުމުގައި ކާޑިފްގެ ގޯލްކީޕަރު، އީތަން ހޯވާތު ވަނީ މޮޅު ސޭވްތަކެއް ކޮށްފައެވެ.

ދެވަނަ ހާފުގައި ވިލާގެ ދެ ލަނޑު ވެސް ޖަހައިދިނީ ސްޕެއިނުގެ މިޑްފީލްޑަރު، މާކޯ އަސެންސިއޯ އެވެ. މިއީ ވިލާ އަށް ބަދަލުވި ފަހުން އެ ޓީމުގެ ފުރަތަމަ އެގާރައިގައި ހިމެނިގެން ކުޅުނު ދެ މެޗުގައި އަސެންސިއޯ ޖެހި ހަތަރުވަނަ ގޯލެވެ.