އޮނަތިރީސް ވަނަ އެމްބީއޭ ޗެމްޕިއަންޝިޕްގައި ރޭ ކުޅުނު އެމްބީއޭ ކަޕްގެ ޗެމްޕިއަންކަން ޓީ-ރެކްސް ބާސްކެޓްބޯލް ކުލަބު ހޯދައިފިއެވެ.

ޒުވާނުން މަރުކަޒު އެތެރޭ ކޯޓުގައި ރޭ ކުޅުނު އެމްބީއޭ ކަޕް ފައިނަލުގައި ޓީ-ރެކްސް ވަނީ 62-54 އިން ކިންގްސް ބާސްކެޓްބޯލް ކުލަބު ބަލިކޮށްފައެވެ.

މެޗުން ޓީ-ރެކްސް މޮޅުވުމުގެ ސަބަބަކަށްވީ ފުރަތަމަ ދެ ކުއާޓާގައި އެ ޓީމުން ނެގި ލީޑެވެ. ފުރަތަމަ ކުއާޓާގައި 16-11 އަދި ދެވަނަ ކުއާޓާގައި 17-14 އިން ޓީ-ރެކްސް ވަނީ ކުރި ހޯދާފައެވެ.

ފުރަތަމަ ދެ ކުއާޓާއާ ޚިލާފަށް ފަހު ދެ ކުއާޓާ ފެނުނީ އެއްވަރުކޮށެވެ. އެހެންކަމުން، ތިންވަނަ ކުއާޓާގައި ދެ ޓީމު 11-11 އިން އެއްވަރުވިއިރު، ފަހު ކުއާޓާ ނިމުނީ ވެސް 18-18 އިން އެއްވަރުވެގެންނެވެ.

މި މެޗުގައި ޓީ-ރެކްސް މޮޅުކޮށްދިނުމުގައި މުހިއްމު ދައުރެއް އަދާކުރީ އެ ޓީމުގެ ކެޕްޓަން، އިސްމާއިލް ވިލްދާން ޔޫސުފް އެވެ. ވިލްދާން ވަނީ 13 ޕޮއިންޓާއެކު، ހަތް ރީބައުންޑް ނަގައި، ނުވަ ސްޓީލް ހޯދާފައެވެ. ދެން އެންމެ ރަނގަޅަށް ކުޅުނީ 14 ޕޮއިންޓާއެކު، ހަ ރީބައުންޑް ނެގި މުޙައްމަދު ނާފް އިރުޝާން އެވެ.

ކިންގްސް އިން އެންމެ ރަނގަޅަށް ކުޅުނު މުޙައްމަދު ސަބީހު ތައުފީޤު ވަނީ 20 ޕޮއިންޓް އެއްކޮށްދީފައެވެ. އެ ޓީމުން ދެން އެންމެ ރަނގަޅަށް ކުޅުނީ މުޙައްމަދު ޖިދާދު އިބްރާހިމް ޔާދް އެވެ. ޖިދާދު ވަނީ 14 ޕޮއިންޓާއެކު 10 ރީބައުންޑްނަގައި، ޑަބަލް-ޑަބަލްއެއް ފުރިހަމަކޮށްފައެވެ.

މުބާރާތުގައި އިއްޔެ ކުޅުނު ޝީލްޑް ފައިނަލުގައި ޔުނައިޓެޑް ނެޓްވޯކް އޮފް ފްރެންޑްސް ވަނީ 99-92 އިން ސްޓިންގާސް ބާސްކެޓްބޯލް ކުލަބު އަތުން މޮޅުވެފައެވެ.