އުމްރާނީ ތަރައްގީގެ ސަރަހައްދުތަކާއި އާބަން ސެންޓަރުތަކާ ގުޅޭ ގޮތުން އަރާފައިވާ އޮޅުންތައް ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ އިން މިރޭ އިތުރަށް ތަފްސީލް ކޮށްދެއްވައިފި އެވެ.

ރައީސުލް ޖުމްހޫރިއްޔާގެ އުމްރާނީ ތަރައްގީގެ ސަރަހައްދީ ތަސައްވަރަކީ ރާއްޖޭގެ އުތުރުގެ ހަތަރު އަތޮޅު (ހއ، ހދ، ށ އަދި ނ) ހިމެނޭ ގޮތަށް އުތުރުގެ އުމްރާނީ ތަރައްގީގެ ސަރަހައްދަކާއި ދެކުނު ހަތަރު އަތޮޅު (ގއ، ގދ، ޏ އަދި އައްޑޫ) ހިމެނޭ ގޮތަށް ދެކުނުގެ އުމްރާނީ ތަރައްގީގެ ސަރަހައްދެއް ތަރައްގީ ކުރުމެވެ. 

މި ދެ ސަރަހައްދުގައި ވެސް އެކި ރަށްރަށް އާބާދީ އާއި ތަރައްގީ އެއްފަސްކުރުމުގެ ސިޔާސަތުގެ ދަށުން އާރބަން ސެންޓަރުތަކެއްގެ ގޮތުގައި ތަރައްގީ ކުރެވޭނެ އެވެ.

މި ދެ ސަރަހައްދުގެ ބޭރުން އުމްރާނީ ތަރައްގީގެ ހަތް މަރުކަޒު (އާނބަން ސެންޓަރު) ރައީސުލްޖުމްހޫރިއްޔާ އިއުލާން ކުރައްވާފައިވާކަން ގެދޮރުވެރިކަމާ ބެހޭ ވުޒާރާ އިން ވަނީ ފާހަގަ ކުރައްވައިފަ އެވެ. އެއީ:

ރ. އުނގޫފާރު

- ބ. އޭދަފުށި

- ޅ. ނައިފަރު

- އދ. މަހިބަދޫ

- ފ. ނިލަންދޫ

- ދ. ކުޑަހުވަދޫ

ރައީސް ޑޮކްޓަރ މުހައްމަދު ވެސް މިރޭ އެކްސްގައި ކުރެއްވި ޕޯސްޓެއްގައި ވަނީ އެމަނިކުފާނުގެ މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާން ބަޔާންކޮށްދެއްވާފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން ގެ އިތުރުން އެންމެ މަތީ ފަންތީގެ ޚިދްމަތްތައް ހިމެނޭހެން، އެންމެ އުތުރުގެ ތިން އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުން އަދި އޭގެ އިތުރަށް ހަތް އަރބަން ސެންޓަރު (މާލެއިން އުތުރުން 3، މާލެއިން ދެކުނުން 4) ތަރައްޤީ ކުރުން އެއީ ސަރުކާރުގެ ސިޔާސަތު ކަމަށް ވިދާޅުވެފަ އެވެ.

މާލެ ސިޓީ ނުހިމަނައި، އިތުރު ހަތް އާބަން ސެންޓަރު އެންމެ މަތީ ފެންވަރުގެ ހިދުމަތްތަކާ އެކު ތަރައްގީ ކުރައްވަން ނިންމަވައި، އެކަން ވަނީ އެކި ފަހަރުމަތިން ރައީސް އިއުލާނު ކުރައްވާފަ އެވެ.

ދިވެހީންގެ ރާއްޖެ މެނިފެސްޓޯގެ 4 ވަނަ ބާބު (ގެދޮރުވެރިކަމާއި އަރބަނައިޒޭޝަން) ގެ ނަންބަރު 4.12 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ހއ. އަތޮޅާއި، ހދ، އަތޮޅު އަދި ށ. އަތޮޅު ހިމެނޭ އުތުރުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައި ހދ. ކުޅުދުއްފުށި ހިމަނައިގެން، ބައިނަލްއަޤުވާމީ ދޮރޯއްޓެއްގެ ގޮތުގައި ހދ. ހަނިމާދޫ ޤާއިމުކޮށް، ހއ. އިހަވަންދިއްޕޮޅުގައި ބައިނަލްއަޤުވާމީ ޓްރާންސްޝިޕްމަންޓް ބަނދަރެއް ޤާއިމުކުރުމުގެ ތަޞައްވުރެކެވެ.

ހަމަ މި ބާބުގެ 4.13 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ގއ. އަތޮޅާއި، ގދ، އަތޮޅު އަދި ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައްޔާއި ބައިނަލްއަޤުވާމީ ދޮރޯއްޓެއްގެ ގޮތުގައި އައްޑޫ ސިޓީ ހިމަނައިގެން، ހއ. އިހަވަންދިއްޕޮޅުގައި ބައިނަލްއަޤުވާމީ ޓްރާންސްޝިޕްމަންޓް ބަނދަރަކާއި ސިނާޢީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗަރުގެ އިތުރުން ފަތުރުވެރިކަމުގެ ވަޞީލަތްތައް ފުޅާކޮށް، ތަރައްޤީކުރުމުގެ ތަޞައްވުރެކެވެ. މި ބާބުގެ 4.14 ގައި ވަނީ، މެދުމިނުގެ އިތުރު 7 އަރބަން ސެންޓަރު (މާލެއިން އުތުރުގައި 3 އަދި ދެކުނުގައި 4 ހިމެނޭގޮތަށް) ތަރައްޤީކުރުމުގެ ތަޞައްވުރެކެވެ.