ރާއްޖޭގެ ސަރަހައްދީ ތަރައްގީއަށް ހާއްސްކޮށްގެން އާބަން ސެންޓަރުތައް ގާއިމް ކުރަން ނިންމާފައިވާ ރަށްތައް އާންމުކުރުމުން، އޮޅުން އަރައި ގޮތަށް ބައެއް ފަރާތްތަކުން ދައްކަމުންދާ ވާހަކަތައް ރައީސް ޑޮކްޓަރ މުހައްމަދު މުއިއްޒު މިއަދު ސާފުކޮށްދެއްވައިފި އެވެ.

އެކްސްގައި ރައީސް ޑޮކްޓަރ މުއިއްޒު މިއަދު ކުރެއްވި ޕޯސްޓެއްގައި ވިދާޅުވީ މެނިފެސްޓޯގައި (ޗެޕްޓަރ 4، ނަންބަރު 12، 13 އަދި 14 ގައި) ވަރަށް ސާފުކޮށް ބަޔާންކޮށް އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމަޔަށް އެތައް ޖަލްސާއެއްގައި އެމަނިކުފާން ބަޔާންކޮށްދެއްވާފައިވާ ފަދައިން، ދެމެހެއްޓެނިވި ސަރަޙައްދީ ތަރައްޤީގެ ސިޔާސަތުގެ ދަށުން މާލެ އަރބަން ރީޖަން ގެ އިތުރުން އެންމެ މަތީ ފަންތީގެ ޚިދްމަތްތައް ހިމެނޭހެން، އެންމެ އުތުރުގެ ތިން އަތޮޅު ހިމެނޭހެން ނޮރދަން އިންޓަރގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ ހަތަރު އަތޮޅު ހިމެނޭހެން ސަރދަން އިންޓަރގްރޭޓަޑް ޑިވެލޮޕްމަންޓް ޒޯނެއް ތަރައްޤީ ކުރުން އަދި އޭގެ އިތުރަށް ހަތް އަރބަން ސެންޓަރު (މާލެއިން އުތުރުން 3، މާލެއިން ދެކުނުން 4) ތަރައްޤީ ކުރުން އެއީ ސަރުކާރުގެ ސިޔާސަތު ކަމަށެވެ. އަދި މި ކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްޤީގެ މާސްޓަރޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ޚިޔާލާއި، ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ޤަސްދުކުރާ ކަންކަން ކަމަށް އެމަނިކުފާން ވިދާޅުވި އެވެ.

"ކަންކަމުގެ ހަގީގަތް ނުބައްލަވައި، ނުވަތަ ޙަޤީޤަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން،" ރައީސްގެ ޓްވީޓްގައި ވިދާޅުވެފައިވެ އެވެ.

ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވުޒާރާ އިން މިއަދު ވަނީ އާބަން ސެންޓަރުތައް ގާއިމްކުރާނެ ހަތް ރަށެއް އިއުލާން ކުރައްވައިފަ އެވެ. ރައީސްގެ ވައުދުފުޅާ އެއްގޮތަށް އަރބަން ސެންޓަރު ގާއިމްކުރަން އެމަނިކުފާން ނިންމަވާފައިވާ ހަތް ރަށް ތިރީގައި އެވަނީ އެވެ.

1- އުނގޫފާރު

2- ބ. އޭދަފުށި

3- ޅ. ނައިފަރު

4- އދ. މަހިބަދޫ

5- ފ. ނިލަންދޫ

6- ކުޑަހުވަދޫ

7- ލ. ފޮނަދޫ

މާލެ ސިޓީ ނުހިމަނައި، އިތުރު ހަތް އާބަން ސެންޓަރު އެންމެ މަތީ ފެންވަރުގެ ހިދުމަތްތަކާ އެކު ތަރައްގީ ކުރައްވަން ނިންމަވައި، އެކަން ވަނީ އެކި ފަހަރުމަތިން ރައީސް އިއުލާނު ކުރައްވާފަ އެވެ.

ދިވެހީންގެ ރާއްޖެ މެނިފެސްޓޯގެ 4 ވަނަ ބާބު (ގެދޮރުވެރިކަމާއި އަރބަނައިޒޭޝަން) ގެ ނަންބަރު 4.12 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ހއ. އަތޮޅާއި، ހދ، އަތޮޅު އަދި ށ. އަތޮޅު ހިމެނޭ އުތުރުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައި ހދ. ކުޅުދުއްފުށި ހިމަނައިގެން، ބައިނަލްއަޤުވާމީ ދޮރޯއްޓެއްގެ ގޮތުގައި ހދ. ހަނިމާދޫ ޤާއިމުކޮށް، ހއ. އިހަވަންދިއްޕޮޅުގައި ބައިނަލްއަޤުވާމީ ޓްރާންސްޝިޕްމަންޓް ބަނދަރެއް ޤާއިމުކުރުމުގެ ތަޞައްވުރެކެވެ.

ހަމަ މި ބާބުގެ 4.13 ގައި ވަނީ، މާލޭ އަރބަން ރީޖަންގެ އިތުރުން، މަތީ ފަންތީގެ ޚިދުމަތް ލިބޭ ސަރަޙައްދެއްގެ ގޮތުގައި ގއ. އަތޮޅާއި، ގދ، އަތޮޅު އަދި ފުވައްމުލަކު ސިޓީ އަދި އައްޑޫ ސިޓީ ހިމެނޭ ދެކުނުގެ ތަރައްޤީ ޒޯނުގައި، އިދާރީ މައި ހަބުގެ ގޮތުގައްޔާއި ބައިނަލްއަޤުވާމީ ދޮރޯއްޓެއްގެ ގޮތުގައި އައްޑޫ ސިޓީ ހިމަނައިގެން، ހއ. އިހަވަންދިއްޕޮޅުގައި ބައިނަލްއަޤުވާމީ ޓްރާންސްޝިޕްމަންޓް ބަނދަރަކާއި ސިނާޢީ މަސައްކަތްތަކާއި، މަސްވެރިކަމާއި، ދަނޑުވެރިކަމާއި، މެރިކަލްޗަރުގެ އިތުރުން ފަތުރުވެރިކަމުގެ ވަޞީލަތްތައް ފުޅާކޮށް، ތަރައްޤީކުރުމުގެ ތަޞައްވުރެކެވެ. މި ބާބުގެ 4.14 ގައި ވަނީ، މެދުމިނުގެ އިތުރު 7 އަރބަން ސެންޓަރު (މާލެއިން އުތުރުގައި 3 އަދި ދެކުނުގައި 4 ހިމެނޭގޮތަށް) ތަރައްޤީކުރުމުގެ ތަޞައްވުރެކެވެ.