ރާއްޖޭގެ ކަނޑުދަތުރުފަތުރު ކުރުމުގެ ސިނާޢަތަށް ޚާއްސަކޮށްގެން ބާއްވާ އެންމެ ބޮޑު އިވެންޓް ކަމަށްވާ މޯލްޑިވްސް މެރިން އެކްސްޕޯގެ 10 ވަނަ އެޑިޝަން އަންނަ މަހު ހުޅުމާލޭ ސެންޓްރަލް ޕާކުގަައި ބާއްވަން ނިންމައިފިއެވެ.

މޯލްޑިވްސް މެރިން އެކްސްޕޯއަކީ ސަފާރީ ސިނާޢަތުގެ ވިޔަފާރިވެރިންގެ ޖަމިއްޔާ ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް)ގެ ރަސްމީ އިވެންޓެވެ. މި އިވެންޓު ކުރިއަށް ގެންދާނީ ފެބްރުއަރީ 6 އިން 9 އަށް ކޮންމެ ދުވަހަކު ހަވީރު 4:00 އިން ފެށިގެން ރޭނގަނޑު 10:00 އަށެވެ. 

މޯލްޑިވްސް މެރިން އެކްސްޕޯ 2025 އިންތިޒާމުކުރަނީ މީޑިއަމް އިވެންޓްސް އިންނެވެ. މިއީ ސަފާރީ ސިނާޢަތަށް ޚާއްޞަކޮށްގެން ރާއްޖޭގައި އެންމެ ގިނަ ދުވަސް ވަންދެން ބާއްވަމުން އަންނަ އިވެންޓެވެ.

މިފަހަރުގެ އެކްސްޕޯގައި ވެސް ވިޔަފާރިތައް އެގްޒިބިޓް ކުރާނެ ސްޓޯލްތަކާއި، ބޯޓުތައް ދައްކާލަން ޚާއްސަ ސަރަޙައްދެއްގެ އިތުރުން މަަޢުލޫމާތު ދިނުމުގެ ސެމިނާތަކާއި އާންމުންނާއި ގުޅުންހުރި ކަންކަންވެސް ކުރިއަށް ގެންދާނެއެވެ. މީޑިއަމް އިވެންޓްސް އިން ބުނީ މިފަހަރުގެ އެކްސްޕޯގައި ކޮންމެ ރެއަކަށް ވެސް ވަކި ތީމެއް ކަނޑައަޅާ އެ ތީމަކާ ގުޅޭ ޙަރަކާތްތައް ކުރިއަށް ގެންދާނެ ކަމަށެވެ. 

ކަނޑުގެ އުޅަނދުފަހަރާއި، އެ އުޅަނދުތަކަށް ބޭނުންވާ ތަފާތު އާލާތްތައް ވިއްކާ ވިޔަފާރިތަކުގެ އިތުރުން، މި އުޅަނދުތަކަށް ތަފާތު ޚިދުމަތްދޭ އިންޝުއަރެންސާއި ލޮޖިސްޓިކްސް ވިޔަފާރިތަކުން ވެސް އެކްސްޕޯގައި ބައިވެރިވާނެ އެވެ.

މީޑިއަމް އިވެންޓްސްއިން ބުނީ އެކްސްޕޯގައި ބައެއް ކުންފުނިތަކުން އާ މޮޑެލްތަކުގެ އުޅަނދު ފަހަރާއި، އާ އުފެއްދުންތައް ބާޒާރަށް ނެރޭނެ ކަމަށެވެ. 

ރާއްޖޭގެ މެރިން އިންޑަސްޓްރީއަށް ބޮޑެތި ކުރިއެރުންތަކެއް މިދިޔަ މަދު އަހަރުތަކުގެ ތެރޭގައި ވަނީ ލިބިފަ އެވެ. ބައިނަލްއަގްވާމީ ބޮޑެތި ލަގްޒަރީ ބްރޭންޑުތައް ރާއްޖެ އަށް އައިސް ވިޔަފާރި އަންނަނީ ފުޅާކުރަމުންނެވެ. މިއަހަރުގެ މެރިން އެކްސްޕޯގައި މަޝްހޫރު ގިނަ ބްރޭންޑުތަކެއް ފެނިގެންދާނެ އެވެ.