މިދިޔަ 2024 ވަނަ އަހަރުގެ ނޮވެމްބަރު މަހުގެ ނިޔަލަށް ޔުނައިޓެޑް އަރަބް އެމިރޭޓްސް އާއި ޗައިނާއިން މުދާ ރާއްޖެއަށް އިމްޕޯޓުކުރި މިންވަރު އޭގެ ކުރީ އަހަރުގެ އެ މުއްދަތުގައި އެ ޤައުމުތަކުން މުދާ އިމްޕޯޓުކުރި މިންވަރަށްވުރެ އިތުރުވެއްޖެއެވެ. 

މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީގެ ތަފާސްހިސާބުތަކުން ދައްކާ ގޮތުގައި 2023 ވަނަ އަހަރުގެ އެ މުއްދަތުގައި ރާއްޖެއަށް އެންމެ ގިނައިން މުދާ އިމްޕޯޓުކޮށްފައި ވަނީ އިންޑިޔާއިންނެވެ. ނަމަވެސް 2024 ވަނަ އަހަރު އެންމެ ގިނަ މުދާ އިމްޕޯޓުކޮށްފައި ވަނީ ޔޫއޭއީންނެވެ. 

އެގޮތުން ޔޫއޭއީން 2024 ގައި މުދާ އިމްޕޯޓުކުރި މިންވަރުވަނީ 41.3 އިންސައްތަ އިތުރުވެފައެވެ. މަރުކަޒީ ބޭންކުގެ ހިސާބުތައް ދައްކާ ގޮތުން 2023 ގައި ޔޫއޭއީން 419 މިލިއަން ޑޮލަރުގެ މުދާ އިމްޕޯޓުކޮށްފައިވާއިރު ފާއިތުވި އަހަރު 592.1 މިލިއަން ޑޮލަރުގެ މުދާ އެ ޤައުމުން އިމްޕޯޓުކޮށްފައިވެއެވެ. 

ހަމައެހެންމެ ޗައިނާއިން މުދާ އިމްޕޯޓުކުރި މިންވަރު އޭގެ ކުރީ އަހަރަށްވުރެ ފާއިތުވި އަހަރު 15.5 އިންސައްތަ އިތުރުވެފައިވާކަން މަރުކަޒީ ބޭންކުގެ ހިސާބުތަކުން ދައްކައެވެ. ދެހާސް ތޭވީސް ވަނަ އަހަރު ޗައިނާއިން އިމްޕޯޓުކުރީ 354.7 މިލިއަން ޑޮލަރުގެ މުދަލެވެ. ނަމަވެސް 2024 ގައި އެ އަދަދު ވަނީ 409.9 މިލިއަން ޑޮލަރުގެ މުދަލށް އަރާފައެވެ. 

މި ދެ ޤައމުން މުދާ އިމްޕޯޓުކުރި މިންވަރު އިތުރުވިއިރު އިންޑިޔާއިން މުދާ އިމްޕޯޓުކުރި މިންވަރުވަނީ 13.2 އިންސައްތަ ދަށްވެފައެވެ. ދެހާސް ތޭވީސް ވަނަ އަހަރު، އެ ޤައުމުން 500 މިލިއަން ޑޮލަރުގެ މުދާ އިމްޕޯޓުކޮށްފައިވާއިރު ނިމުނު އަހަރުގެ އިމްޕޯޓުކުރީ 434.6 މިލިއަން ޑޮލަރުގެ މުދަލެވެ. 

ޗައިނާއިން މުދާ އިމްޕޯޓުކުރާ މިންވަރު ފާއިތުވި އަހަރު އިތުރުވެފައިވާއިރު، މި އަހަރުގެ ޖަނަވަރީ އެއްވަނަ ދުވަހުން ފެށިގެން ޗައިނާ އާއި ރާއްޖޭގެ މެދުގައި މިނިވަން ވިޔަފާރީގެ އެއްބަސްވުމަކަށް އަމަލުކުރަންވަނީ ފަށައިފައެވެ. އެ އެއްބަސްވުމުގެ ދަށުން ޗައިނާއިން ގިނަ ޢަދަދެއްގެ މުދާ ޑިއުޓީއަކާ ނުލައި ރާއްޖެއަށް އެތެރެކުރެވޭނެއެވެ. 

އަދި އެ އެއްބަސްވުމުގެ ސަބަބުން ދިވެހިރާއްޖޭގައި އުފައްދާ ގިނަ ބާވަތްތަކެއްގެ މުދާ ޑިއުޓީ ނުދައްކައި ޗައިނާއަށް ބޭރުކުރެވޭނެއެވެ. ޑިއުޓީއަކާ ނުލައި ޗައިނާއަށް ބޭރުކުރެވޭ މުދަލުގެ ތެރޭގައި ރާއްޖެއިން ބޭރުކުރާ މަހުގެ އުފެއްދުންތަކާއި މަހުގެ ބާވަތްތައް ހިމެނޭނެއެވެ. 

ޗައިނާ-ރާއްޖެ މިނިވަން ވިޔަފާރީގެ އެއްބަސްވުމަށް އަމަލުކުރަން ފެށުމާއެކު ފަސޭހަމަަކާއެކު ދެ ޤައުމުގެ މެދުގައި ވިޔަފާރިކުރެވި، ހެޔޮ އަގުގައި މުހިއްމު ގިނަ މުދާ ރާއްޖޭގެ ބާޒާރަށް ގެނައުމަށް މަގުފަހިވާނެއެވެ.