ބަހާމާސްގެ ފަސިންޖަރު ލައިނެއް ގިނަ އަދަދެއްގެ ފަތުރުވެރިންނާއެކު ރާއްޖޭގައި ބަނދަރުކޮށްފިއެވެ.

މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް، މާޔާއިން މައުލޫމާތު ދިން ގޮތުގައި، މި ކުރޫޒް ޝިޕުން 212 ފަތުރުވެރިން ރާއްޖެ ޒިޔާރަތްކޮށްފައިވެއެވެ. މީގެ އިތުރުން، ބުރާސްފަތި ދުވަހު ރާއްޖެ އައިސްފައިވަނީ ބަހާމާސްގެ "ކްރިސްޓަލް ސިމްފޮނީ" ނަމަކަށްކިޔާ ކުރޫޒް ޝިޕެއް ކަމަށާއި މި ޝިޕް ރާއްޖެ އައިސްފައިވަނީ ސީޝެލްސްއިން ކަމަށް މާޔާއިން ބުނެއެވެ. މި ކްރޫޒް ލައިނާ ދެން ދަތުރުކުރުމަށް ހަމަޖެހިފައި ވަނީ ސްރީ ލަންކާއަށެވެ.

މާޔާ އިން ބުނީ، މިއީ މި އަހަރު ރާއްޖޭގައި ބަނދަރުކުރި ހަތަރު ވަނަ ކްރޫޒް ޝިޕް ކަމަށާއި މިދިޔަ މަހުގެ 30 ވަނަ ދުވަހު ވެސް 3000 އަށްވުރެ ގިނަ ފަތުރުވެރިނާއެކު ސީޝެލްސްއިން ދެ ކްރޫޒު ޝިޕް ރާއްޖެ އައިސްފައިވާ ކަމަށެވެ.

ރާއްޖޭގެ ފަތުރުވެރިކަމުގެ ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލުކުރެވިފައިވާ ކަމަށް ވެސް މާޔާއިން ހާމަކުރެއެވެ.

ކްރޫޒް ޝިޕްތަކުގެ މެދުގައި ރާއްޖެ މަޤްބޫލުވަމުން އަންނަ އިރު، ރާއްޖެއަށް އަންނަ ފަތުރުވެރިންގެ އަދަދަށް ވެސް ބޮޑު ކުރިއެރުމެއް އަންނަ ކަމަށް ފަތުރުވެރިކަމާބެހޭ ވުޒާރާގެ ތަފާސްހިސާބުތައް ދައްކާއެވެ. މި އަހަރުގެ ފުރަތަމަ 7 ދުވަސްތެރޭ ވަނީ 43،000 އަށްވުރެ ގިނަ ފަތުރުވެރިން ރާއްޖެ އައިސްފައެވެ. މި އަދަދަކީ މިދިޔަ އަހަރުގެ މި މުއްދަތާ އަޅާ ބަލާއިރު 9.7 އިންސައްތަ އިތުރު ޢަދަދެކެވެ.