މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) ރީ ބްރޭންޑުކޮށް، އާ ވެބްސައިޓު ލޯންޗުކޮށް އެ އެސޯސިއޭޝަންގެ ރައީސަކަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ)ގެ މިހާރުގެ ޗެއާމަން އަބްދުﷲ ޤިޔާޒް ރިޔާޒް އިންތިޚާބު ކޮށްފިއެވެ.

މެންހަޓަން ބިޒްނަސް ސްކޫލުގައި ރޭ ބޭއްވި މަޓާޓޯގެ 2024-2025 އަހަރުގެ އާންމު ޖަލްސާގައި އެ އެސޯސިއޭޝަންގެ އާ ލޯގޯ އާއި ވެބްސައިޓު ލޯންޗުކޮށްދެއްވާ ޖަލްސާ ޝަރަފުވެރިކޮށްދެއްވީ ފަތުރުވެރިކަމާ ބެހޭ ވަޒީރު އިބްރާހިމް ފައިސަލްއެވެ. 

ރާއްޖެގެ ޓްރެވަލް އެޖެންޓުންނާއި ޓުއައޮޕަރޭޓަރުން ތަމްސީލުކުރުމަށް 2006 އަހަރު އުފެއްދި ޖަމިއްޔާގެ ރައީސް އަކަށް މިދިޔަ ދައުރުގައި ވެސް ހުންނެވީ ޤިޔާޒެވެ. ރޭ ބޭއްވި ޖަލްސާގައި ބޯޑު މެމްބަރުން އައްޔަންކުރުމުގެ އިތުރުން އެކި ގޮތްގޮތުން މަޓާޓޯއަށް ޚިދުމަތްކޮށްދީފައިވާ ފަރާތްތަކުގެ އަގުވަޒަންކޮށް އެ ފަރާތްތަކަށް ހަނދާނީ ފިލާ ވެސް އަރުވާފައިވެއެވެ. 

އަންނަ އަަހަރު މަޓާޓޯ އަށް 2.44 މިލިއަން ރުފިޔާ އާމްދަނީގެ ގޮތުގައި ލިބޭނެ ކަމަށް ލަފާ ކުރާއިރު، ޚަރަދުވާނެ ކަމަށް ލަފާކޮށްފައި ވަނީ 2.25 މިލިއަން ރުފިޔާއެވެ.