ކިތަންމެ ކުޑަކަމަކުން ނަމަވެސް ނަފާ ހޯދަން ބޭނުން ނަމަ، ބިޒްނަސް ސެންޓަރ ކޯޕްރޭޝަން (ބީސީސީ) ގެ ލަފާ ހޯދަނިކޮށް އެއީ ނަފާ ލިބޭ ކަމަކަށް ހެދިދާނެއެވެ. މީގެ އަށެއްކަ އަހަރު ކުރިން ސަރުކާރުން ބީސީސީ އުފެއްދެވީ ކުދި އަދި މެދުފަންތީގެ ވިޔަފާރިތައް ތަރައްޤީ ކުރުމަށެވެ. ހުނަރެއް ހުރި މަސައްކަތެއް ދަންނަ ކޮންމެ މީހަކަށް ފުރުސަތު ހޯދައިދިނުމަށެވެ.

ބީސީސީން މިދިޔަ އަހަރު ކުރިއަށް ގެންދިޔަ މަސައްކަތްތަކާ އަދި މި އަހަރު ކުރަން ރާވާފައިވާ މަސައްކަތްތަކާ ބެހޭ ގޮތުން އެމްއެމްޓީވީ އަށް މައުލޫމާތު ދެއްވީ އެ ކުންފުނީގެ މެނޭޖިން ޑިރެކްޓަރ އިބްރާހިމް ޒިޔާއު މުޙައްމަދާއި ޑެޕިއުޓީ މެނޭޖިންގ ޑިރެކްޓަރ ސާމިހް އާދަމްއެވެ.

ބީސީސީން ފާހަގަ ކުރެއްވި ގޮތުގައި ފާއިތުވި އަހަރު އެންމެ ބޮޑު ސަމާލުކަމެއް ދެވުނު އެއް ކަމަކީ ނަތީޖާނެރުމަށް އިސްކަންދީ ކުންފުނީގެ ހިންގުން ފައިދާހުރި ގޮތަށް ބައްޓަންކުރުމެވެ. މިގޮތުން އޮތަންޓިކް މޯލްޑިވްސް ހިންގަމުން އައި މޮޑެލަށް ބަދަލުތަކެއް ގެނެސްފައިވާކަން ބީސީސީން ފާހަގަކުރެއްވިއެވެ.

"ކުރީގައި ވަރަށް ގިނަ އައުޓްލެޓްތައް ހުންނާނެ ރަށްރަށުގައި ޤާއިމު ކުރެވުފައި. ވަރަށް ބޮޑަށް އޮޕަރޭޝަނަލް ޚަރަދުތަކެއް އޭގައި އެބަހިނގާ، ތަނުގެ ކުއްޔާއި މުވައްޒަފުންގެ މުސާރަ އާއި، ދެކޮޅުނުޖެހޭ ގޮތަކަށް ކުރެވިފައި އޮތީ،" ސާމިހް ވިދާޅުވިއެވެ.

ޒިޔާއު ވިދާޅުވީ ބީސީސީގެ ބިޒްނަސް ސެންޓަރތައް (ބީސީ) ރާއްޖޭގެ އެކި ސަރަހައްދުތަކުގައި ޤާއިމުކޮށްފައިހުރި ނަމަވެސް، ރާއްޖޭގެ ގިނަ ބަޔަކަށް ބީސީސީ އަކީ ކީއްކުރާ ތަނެއްކަން ކުރިން ނޭނގޭ ކަމަށެވެ. އެހެންކަމުން ބީސީސީގެ ދައުރު ފުޅާކުރުމަށް މިދިޔަ އަހަރު ވަރަށް ބޮޑަށް މަސައްކަތް ކުރައްވާފައިވާނެ ކަމަށް އޭނާ ވިދާޅުވިއެވެ.

"މީގެ ކުރިން އަޅުގަނޑުމެން ބައެއް ރަށްތަކަށް އަރާފައި ބިޒްނަސް ސެންޓަރ ކޯޕަރޭޝަނޭ ބުނީމަ އެބަ އަހާ، އެއީ ކޮން ތަނެއްތޯ؟ އެކަމަކު މިހާރު ހާލަތު ބަދަލުވެއްޖެ، މިހާރު ބޮޑެތި ސިޓީތަކަށް އަރާފައި ބިންޒްނަސް ސެންޓަރ ކޯޕްރޭޝަން (ބީސީސީ) އޭ ބުނީމަ ކޮންމެ މީހަކަށްވެސް އެނގޭ އެއީ ކޮންތަނެއްކަން،" ޒިޔާއު ވިދާޅުވިއެވެ.

ބީސީސީން ވިދާޅުވި ގޮތުގައި ރާއްޖޭގެ ހުރިހާ ރަށެއްގެ އިގްތިސާދީ ހަރަކާތްތަކުގެ ޕްރޮފައިލް ހެދުމަށް މިދިޔަ އަހަރުގެ ފަހުކޮޅު ފެށި މަސައްކަތް މިއަހަރުގެ މެދުތެރޭގައި ނިންމާލެވި ހުރިހާ ރަށެއްގެ ޕްރޮފައިލް މި އަހަރުގެ ތެރޭގައި ނެރެވޭނެއެވެ.

ޒިޔާއު ވިދާޅުވީ އެ ޕްރޮފައިލްގައި ހިމެނޭ މައްލޫމާތުތަކުގެ ސަބަބުން، ރަށްރަށުގެ އިގްތިސާދީ މަސައްކަތްތަކަށް ފަހިވާ ގޮތަށް ދައުލަތުގެ ބަޖެޓު އެކަށައެޅުމަށް ފުރުސަތު ލިބިގެންދާނެ ކަމަށެވެ. އަދި ކޮންމެ ރަށެއްގައި ލިބެންހުރި ޚިދުމަތްތަކާއި ކުރާ މަސައްކަތްތަކުގެ މައުލޫމާތު އާންމުކޮށް ލިބެން ހުންނާނެއެވެ.

"މި ޕްރޮފައިލިން ނިމޭއިރުގައި ދެން އަންނަ އަހަރު، ސަރުކާރުން ބަޖެޓެއް ކަނޑައަޅާއިރު ވަރަށް މުހިއްމު ނިންމުމެއް ނިންމިގެންދާނެ، އަޅުގަނޑުމެންގެ ނަތީޖާތަކަށް ބެލުމަށްފަހުގައި،........ ކޮންމެ ރަށެއްގެ އިކޮނިމިކް ޕްރޮފައިލިންއެއް އަޅުގަނޑުމެން ހަދަމުން މިދަނީ، އެ ރަށެއްގައި އިގްތިސާދީ ހަރަކާތްތައް ހިންގަމުން ދަނީ ކިހާވަރަކަށްތޯ ކޮބައިތޯ ފުރުސަތުތަކަކީ ވަރަށް ރަނގަޅަށް ދިރާސާ ކުރެވިގެންދާނެ،" ޒިޔާއު ވިދާޅުވިއެވެ.

ކުދި އަދި މެދުފަންތީގެ ވިޔާފާރިތަކަށް ދިމާވާ ހުރިހާ ކަމެއްގައި ބޭނުންވާ ލާފާދިނުމަށް ބީސީސީ ކްލިނިކެއް މިއަހަރުގެ ތެރޭގައި ހުޅުވަން ހަމަޖެހިފައިވާ ކަމަށް ޒިޔާއު ވިދާޅުވިއެވެ. އެނާ ވިދާޅުވި ގޮތުގައި ރާއްޖޭގައި ވިޔަފާރީގެ ދާއިރާއިން ކިޔަވައިގެން ތިއްބެވި ފަރާތްތައް މެދުވެރިކޮށް ލަފާ ހޯދުމުގެ ފުރުސަތު މި ކްލިނިކުން ލިބިގެންދާނެއެވެ.

"މިއީ މިހާރުވެސް ކުރަމުން އަންނަ ކަމެއް. ބީސީތައް މެދުވެރިކޮށް ކޮންޝާލްޓެންސީ ދިނުން، މި ޚިދުމަތް ކްލިނިކެއްގެ ގޮތުގައި މިގެންދަނީ ޚިދުމަތް ފުޅާކުރުމަށްޓަކައި،" އޭނާ ވިދާޅުވިއެވެ.

ފަންނުވެރިންނަށް މާލޭގައި އިމާރާތްކުރާ ކްރިއޭޓިވް ހަބް މިއަހަރުގެ ތެރޭގައި ހުޅުވުމަށް ވެސް ބީސީސީން އަންނަނީ މަސައްކަތް ކުރަމުންނެވެ. އަދި ކަނބަލުންނަށް ޚާއްސަކޮށް ހުޅުމާލޭގައި ކުރިއަށްދާ ހިޔަލަ މާކެޓުން، ކޮންމެ ހަފުތާ ބަންދެއްގައި އާ ފަރާތްތަކަށް ފުރުސަތުދީ، ހަފުތާ ބަންދު ޚާއްސަ ކުރަން މިމަހުގެ ތެރޭގައި ފައްޓަވާނެ ކަމަށް ބީސީސީން ވިދާޅުވިއެވެ. މީގެ އިތުރުން މަހާ ޕޯޓަލް މެދުވެރިކޮށް މަހުގެ ބާވަތްތައް ވިއްކާ ފަރާތްތަކަށް، މަހާ ޕޯޓަލްގެ ރީޓޭލް ފިހާރައެއް ހުޅުވަންވެސް ބީސީސީން މި އަހަރަށް ވަނީ ތާވަލުކޮށްފައެވެ.

ކުރިން އެނގެނީ ބީސީސީ ކިޔާ ތަނެއް ހުންނަކަމެވެ. ބީސީސީން ކުރާ މަސައްކަތުގެ ސަބަބުން ކުދި އަދި މެދު ފަންތީގެ ވިޔަފާރިތަކަށް މިހާރު އެއީ ކޮންތަނެއްކަން އެނގެއެވެ.