ޤާނޫނުތަކަށް ގެނައި އިސްލާހުތަކަކީ ރައްޔިތުންގެ އަޑު އަހައި، ރައްޔިތުންގެ އިހުސާސްތަކާ އެއްގޮތްވާގޮތުގެ މަތިން ގެނެވުނު ބަދަލުތަކެއްކަމަށް އިހަވަންދޫ ދާއިރާގެ މަޖިލިސް މެމްބަރު، އަޙްމަދު ނަޞީރު ވިދާޅުވެއްޖެއެވެ.

އެމްއެމް ޓީވީގެ ބޮޑު ޚަބަރު ޕްރޮގްރާމްގައި ވާހަކަދައްކަވަމުން މެމްބަރު ވިދާޅުވީ މި ސަރުކާރު ޤައުމާ ހަވާލުވީއިރު ޤައުމު އޮތީ ވަރަށް ނާޒުކު ހާލަތެއްގައިކަމަށެވެ. އެހެންކަމުން ޤާނޫނީގޮތުން ވަރަށް ގިނަ އިސްލާހުތައް ގެންނަން ޖެހިވަޑައިގަތް ކަމަށާއި، ރައްޔިތުންނަށް ބޭނުންވާ ޙިދުމަތްތައް ފޯރުކޮށްދޭން ޖެހިވަޑައިގަތީ، ދަރަނި މެނޭޖުކުރަމުންކަމަށް މެމްބަރު ވިދާޅުވިއެވެ.

ޤާނޫނަށް ގެނެވުނު އިސްލާހުތައް ފާހަގަކުރައްވާ، ޑޮލަރަށް ގެނައި އިސްލާހަކީ ރައްޔިތުންނަށް އެކަމުގެ މަންފާ އެންމެ ބޮޑަށް ކުރާނެ އިސްލާހުކަމަށް ވެސް މެމްބަރުގެ ވާހަކައިގައި ފާހަގަކުރެއްވިއެވެ. މިކަމުގެ ސަބަބުން ރައްޔިތުންގެ މުސްތަޤަބަލް ބިނާވެ، އިޤްތިޞާދީ ގޮތުން ފައިދާވެ، ދިވެހިރާއްޖޭގެ އާމްދަނީ ދައުރުވުމަށް ހެޔޮ ބަދަލުތަކެއް އަންނާނެކަމަށް ވިދާޅުވިއެވެ.

މިކަމުގެ ނަތީޖާއަށް ވެގެން ދާނީ މުސްތަޤުބަލުގައި ވިޔަފާރިވެރިންނަށާއި އެކިއެކި ކަންކަމުގައި ރާއްޖެއިން ބޭރަށް ދަތުރުކުރާ ފަރާތްތަކަށް ވަރަށް ބޮޑު ފަސޭހައެއްވާނެކަމަށް ވިދާޅުވިއެވެ.