"ބިންވެރިޔާ ސްކީމް" ގެ ދަށުން ގޯތި ލިބޭ މީހުންގެ ލިސްޓުގެ ބޭރުން ހުޅާމާލެއިން ގޯތިތަކެއް ދޫކުރި ކަމަށް ތުހުމަތު ކުރެވޭ މައްސަލައިގައި އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ދައުރެއް ނެތް ކަމަށާއި އަދި ޤާނޫނާ ޚިލާފު އެއްވެސް ކަމެއް އޭނާ ކުރައްވާފައި ނުވާނެ ކަމަށް ވިދާޅުވެއްޖެ އެވެ.

އެ މައްސަަލައާ ގުޅިގެން މިރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވިދާޅުވީ ބިންވެރިޔާ ސްކީމްގެ ރަޖިސްޓްރީ ހަވާލު ކުރަނީ އެޗްޑީސީގެ ފަރާތުން ނޫން ކަމަށެވެ. 

އެހެންވެ ބައުންޑްރީ ވޯލް ރޭނުމުގެ ހުއްދައަށް އެޗްޑީސީގެ ޕޯޓަލް މެދުވެރިވެގެން ހުށައެޅުމުން ރަޖިސްޓްރީ އޮންނަ ފަރާތެއްތޯ ފުރަތަމަ ބަލާ ކަމަށް ވިދާޅުވި އެވެ.

އެހެންވެ އެއްވެސް ހާލެއްގައި ހައުސިން މިނިސްޓްރީން ނާންގާ ފަރާތަކަށް ބިން ދޫކޮށްފައި ނުވާނެ ކަމުގެ ޔަގީންކަން ފަޒުލް ދެއްވި އެވެ.

"އަޅުގަނޑުގެ އިންވޯލްމަންޓެއް މިޔަކު [ގޯތި ދޫކުރި ކަމަށް ބުނާ މައްސަލައިގައި] ނެތް، ވަރަށް ސާފުކޮށް މި ދަންނަވަނީ،" ތުހުމަތުތަކަށް އިންކާރުކޮށް ފަޒުލް ވިދާޅުވި އެވެ.

އެމްޑީ ފަޒުލް ވިދާޅުވީ އެ މައްސަލައާ ގުޅިގެން ފުލުހުން މިއަދު އެޗްޑީސީއަށް ވަތް ކަމަށެވެ.

މި މައްސަލަ އެންމެ ފުރަތަމަ މިއަދު ފާހަގަކޮށްފައި ވަނީ ސޯޝަލް މީޑިއާއިންނެވެ. އެ ޕޯސްޓްގައި ބުނެފައި ވަނީ ފަޒުލްގެ އާއިލީ މަސްލަހަތު ހިމެނޭ ފަރާތަކަށް ގަވާއިދާ ޚިލާފަށް ގޯއްޗެއް ދޫކޮށްފައިވާ ކަމަށެވެ.