ދައުލަތުގެ ބެލުމުގެ ދަށުގައި ބަލަހައްޓާ ކުދިންގެ ބެލެނިވެރިކަމާ ޙަވާލުވާ ސިވިލް ސަރވިސް މުވައްޒަފުންނަށް ޗުއްޓީ ލިބޭގޮތަށް ޤަވާއިދު އިޞްލާޙުކޮށްފިއެވެ. 

ސިވިލް ސަރވިސް ޤަވާއިދަށް ގެނައި އިޞްލާޙުގައި ވަނީ، ފޮސްޓަރ ނިޒާމުގެ ދަށުން ދައުލަތުގެ ބެލުމުގެ ދަށުގައި ތިބޭ ކުދިންނާ ހަވާލުވާ ސިވިލް ސަރވިސްގެ މުވައްޒަފުންނާއި، މައިންބަފައިން ނުވަތަ ޝަރުޢީ ބަލަދުވެރިން ކުއްޖާއާމެދު އިހުމާލުވެގެން ދައުލަތުގެ ބެލުމުގެ ދަށަށް ނެގުމަށްފަހު ކުދިން ބެލެހެއްޓުން ދައުލަތުން ހަވާލުކުރާ ސިވިލް ސަރވިސްގެ މުވައްޒަފުންނަށް ޗުއްޓީ ދެވޭނެ ކަމަށެވެ. 

މުވައްޒަފުންނަށް ޗުއްޓީ ދޭނެ ގޮތުގެ ތަފްޞީލު ވެސް އިޞްލާހުގައި ވަނީ ބަޔާންކޮށްފައެވެ.

މިއިން ކޮންމެ ޗުއްޓީއެއްގައިވެސް މުސާރައާއި އިނާޔަތްތައް ލިބޭނެއެވެ. 

ދައުލަތުގެ ބެލުމުގެ ދަށުގައި ތިބޭ ކުދިންގެ ވެލެނިވެރިކަމާ ޙަވާލުވާ މުވައްޒަފުންނަށް ޗުއްޓީއެއް ދޭގޮތަށް ޤަވާއިދު އިޞްލާޙުކުރިއިރު، ކުދިންނާ ޙަވާލުވާ އާއްމު ފަރާތްތަކުގެ މާލީ ޙާލަތަށް ރިޢާޔަތްކޮށް، 5000 ރުފިޔާ މަހަކު ލިބޭ ޚާއްޞަ އެލަވަންސެއްވެސް ވަނީ ތަޢާރަފްކޮށްފައެވެ. 

ޚާއްޞަ ޗުއްޓީއާއި އެލަވަންސްގެ އިތުރުން، ވިހައިގެން ދަރިފުޅަށް ދެ އަހަރު ވަންދެން ދުވާލަކު ދެ ފަހަރު 30 މިނެޓުގެ ބްރޭކެއް ދިނުމަށް ވަޒީފާއާ ބެހޭ ޤާނޫނަށް ވަނީ ބަދަލު ގެނެސްފައެވެ. ކުރިން މިގޮތަށް ލުއި ދީފައިވަނީ ދަރިފުޅަށް އެއް އަހަރު ވަންދެންނެވެ. މި ލުއި ވެސް ހަމަޖައްސާފައިވަނީ މުސާރައާއި އެލަވަންސްތައް ހިމަނައިގެންނެވެ.