މެދުއިރުމަތީގައި ހިނގަމުންދާ ހަމަލާތައް ނިމުމަކަށް ގެނައުމަށް ގޮވާލުމަށް އޮމާނުން އެކި ގައުމުތަކާއި ބައްދަލުކޮށް މަޝްވަރާކޮށްފިއެވެ.

އެކަމާއި ގުޅިގެން އޮމާންގެ ފޮރިން މިނިސްޓަރު ސައްޔިދު ބަދުރު ބިން ހަމަދު އަލްބުސައިދީ އީޔޫ ނޫން، ޔޫރަޕުގެ ގައުމުތަކުގެ އިތުރުން އެމެރިކާ، ބްރެޒިލް އަދި ތުރުކީގެ ސަފީރުންގެ ގްރޫޕަކާ ވަނީ ބައްދަލުކުރައްވާފައެވެ.

މިފަދަ ދެވަނަ ބައްދަލުވުމެއް ބާއްވާފައިވަނީ، ގަލްފް ކޯޕަރޭޝަން ކައުންސިލްގެ ގައުމުތަކުގެ ތެރެއިން މިސްރާއި އިރާގާއި އުރުދޫންގެ ސަފީރުންނާއެކުގައެވެ.

މި ބައްދަލުވުންތަކުގައި މަޝްވަރާކޮށްފައިވަނީ ހަނގުރާމަ ހުއްޓުވުމަށް ސިޔާސީ އަދި ޑިޕްލޮމެޓިކް ޕްރެޝަރުތައް ކުރިއަށް ގެންދިއުމާއި ވަރުގަދަކުރުމަށް އިސްކަމެއް ދިނުމަށާއި، އޭގެ އަސަރުތައް ހިފެހެެއްޓުމާ ބެހޭ ގޮތުން ކަމަށް އޮމާންގެ ފޮރިން މިނިސްޓްރީން ވަނީ ހާމަކޮށްފައެވެ.

ހަނގުރާމަ ނިމުމަކަށް ގެނައުމަކީ އެންމެންގެ މަސްލަހަތު އޮތް ގޮތް ކަމަށް ވިދާޅުވެ އޮމާންގެ ފޮރިން މިނިސްޓަރު ވަނީ، މިހާރު ހަނގުރާމަ އޮތް މަރުހަލާގެ ގޮތުން ފުރަތަމަ ސަރަހައްދީ އަދި ބައިނަލްއަގުވާމީ ފިޔަވަޅެއް އެޅުމަށް ގޮވާލާފައެވެ.

މެދުއިރުމަތީގެ ހަމަނުޖެހުން ފެށިފައިވަނީ، އީރާނުން ނިއުކްލިއާ ހަތިޔާރު ހޯދަން އުޅޭކަމުގެ ތުހުމަތުކޮށް އެމެރިކާ އާއި އިސްރާއިލުން ގުޅިގެން ފެބްރުއަރީ މަހުގެ 28 ވަނަ ދުވަހު އީރާނަށް ދޭން ފެށި ހަމަލާތަކައި ގުޅިގެންނެވެ. 

މި ހަމަލާތަކުގެ ސަބަބުން އީރާނުން ވަނީ، އިސްރާއިލު އެއްކޮށް ނެތިގެން ނުދަނީސް ހަމަލާތައް ދިނުން ނުހުއްޓާނެ ކަމުގެ އިންޒާރުވެސް ދީފައެވެ.