އުމްރާއަށް މީހުން ގެންދާ އަމިއްލަ ގުރޫޕަކުން ގިނަ ބައެއްގެ އަތުން އުމްރާއަށް ގެންދިއުމުގެ ނަމުގައި ފައިސާ ނެގުމަށްފަހު އުމްރާގެ އިންތިޒާމުތައް ހަމަޖައްސައިނުދިނުމުން އެއިން 28 މީހަކަށް އުމްރާގެ ހުރިހާ ކަމެއް ހައްޖު ކޯޕަރޭޝަނުން ހަމަޖައްސައިދީފިއެވެ. 

ހައްޖު ކޯޕަރޭޝަނުގެ މެނޭޖިން ޑިރެކްޓަ މުހައްމަދު ޝަކީލު އެކްސްގައި ޝާއިއުކުރެއްވި ޕޯސްޓެއްގައި ވިދާޅުވެފައިވަނީ މި އަހަރުގެ ރަމަޟާން މަހުގެ އުމްރާއަށް ގެންދާނެ ކަމުގައި ބުނެ، އަމިއްލަ އުމްރާ ގުރޫޕަކުން ގިނަ ބައެއްގެ އަތުން ފައިސާ ނެގުމަށްފަހު އުމްރާގެ އިންތިޒާމު ހަމަޖައްސައިދީފައިނުވާ މައްސަލަައެއް ފެންމަތިވެފައިވާ ކަމަށެވެ. 

އަދި އެ ގުރޫޕަށް ފައިސާ ދެއްކުމަށްފަހު އުމްރާއަށް ނުދެވި ތިބި ގިނަ ބަޔަކު އުމްރާއަށް ދިއުމުގެ އިންތިޒާމު ހަމަޖައްސައިދިނުމުގައި ހައްޖު ކޯޕަރޭޝަނުން އެހީތެރިވެދިނުމަށް އެދިފައިވާކަން ފާހަގަކުރައްވައި ޝަކީލު ވިދާޅުވީ ހައްޖު ކޯޕަރޭޝަނުގައި ޖާގަ ހުރި މިންވަރަށް ބަލައި އެމީހުންނަށް އެހީތެރިވުމަށް ނިންމާފައިވާ ކަމަށެވެ. 

އެގޮތުން ޖާގަ އޮތް މިންވަރުން 28 މީހެއްގެ ވިސާ ހަމަޖައްސައިދީ މައްކާއާއި މަދީނާގައި ތިބުމާއި ކެއިން ބުއިމުގެ ހުރިހާ ކަމެއް އަދި ދަތުރުފަތުރުގެ އިންތިޒާމުތައް ހައްޖު ކޯޕަރޭޝަނުން ހަމަޖައްސައިދިނުމާއެކު މިއަދު ހެނދުނު މޯލްޑިވިއަންގެ ފުލައިޓެއްގައި އެ 28 މީހުން އުމްރާގެ އަޅުކަން އަދާކުރުމަށް  ސައުދީ އަރަބިއްޔާއަށް ދަތުރުފަށާފައިވާ ކަމަށްވެސް ޝަކީލު ވިދާޅުވިއެވެ. 

މީގެ ކުރިންވެސް އެކި ގުރޫޮޕުތަކުގެ އިހުމާލުން އުމްރާއަށް ދިއުމަށްފަހު ހާލުގައި ޖެހޭ ފަރާތްތަކަށް ހައްޖު ކޯޕަރޭޝަނުން އެހީވެއެވެ. އަދި މިގޮތަށް ފައިސާ ދެއްކުމަށްފަހު އުމްރާނުވެވި ތިބޭ ފަރާތްތަކަށް އެ ކޯޕަރޭޝަނަށް އެހީވެެވެން އޮތް މިންވަރަކުން އަބަދުވެސް އެހީތެރިކަން ފޯރުކޮށްދެއެވެ.