ދިވެހިރާއްޖޭގެ މަރުކަޒީ ބޭންކު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތާރީޚާއި ގުޅުންހުރި އިހުގެ ފޮޓޯ ހޯދުމަށް، އެ އިދާރާއިން އިއުލާންކޮށްފިއެވެ. 

ފޮޓޯ ހޯދަނީ އެ އޮތޯރިޓީގެ ތާރީޚާއި ގުޅުން ހުރި ފޮތެއްގައި ބޭނުން ކުރުމަށެވެ.  

އެމްއެމްއޭއިން ހޯމަ ދުވަހު ކުރި އިއުލާނެއްގައި ބުނީ އެ އޮތޯރިޓީ އާއި ގުޅުން ހުރި ތާރީޚީ ފޮޓޯ ހިއްސާކުރަން ބޭނުންވާ ފަރާތްތަކަށް، އެ ފުރުސަތު މާރިޗު މަހުގެ 24 ވަނަ ދުވަހުގެ މެންދުރުފަހު 3 ޖެހުމާއި ހަމައަށް ހުޅުވާލާފައި ވާކަމަށެވެ. 

ފޮޓޯ ހުށަހެޅުމަށް ބޭނުންވާ ފަރާތްތަކުން އެ އޮތޯރިޓީގެ އީމެއިލް މެދުވެރިކޮށް މައުލޫމާތު ހިއްސާކޮށްދިނުން އެދޭކަމަށާއި، މި ގޮތަށް ހިއްސާކުރާ ފޮޓޯތައް ބޭނުންކުރާނީ އޭގެ ވެރިފަރާތާއިއެކު މަޝްވަރާކޮށް، އެއްބަސްވެވޭ ގޮތެެއްގެ މަތިން ކަމަށްވެސް އެމްއެމްއޭ އިން ބުނެފައިވެއެވެ. 

ތާރީޚީ ފޮޓޯ ހޯދަން އެމްއެމްއޭއިން އިއުލާނުކުރިއިރު، އެ އިދާރާއަކީ 1981 ވަނަ އަހަރުން ފެށިގެން ރާއްޖޭގައި ހިންގަމުން އަންނަ އިދާރާއެވެ. އެ އަހަރު އެމްއެމްއޭ އުފައްދާފައިވަނީ "އެމް.އެމް.އޭގެ ގާނޫނު (1981)" ގެ ދަށުން އެ މުއައްސަސާއަށް ލިބިދީފައިވާ ގާނޫނީ ބާރުގެ ދަށުންނެވެ.