ފަސް އަހަރުގެ ދައުރުގެ ތެރޭގައި އިންތިހާބުތައް މަދުކުރުމަކީ ޑިމޮކްރަސީގެ ހަމަތަކާއި އުސޫލުތަކާ ހިލާފުވުމޭ އިދިކޮޅު ފަރާތްތަކަށް ނުބުނެވޭނެ ކަމަށް ހޮޅުދޫ ދާއިރާގެ މެމްބަރު ޢަބްދުއްސައްތާރު މުޙައްމަދު ވިދާޅުވެއްޖެ އެވެ. 

ދެ އިންތިހާބު އެއް ދުވަހެއްގައި ބޭއްވުމަށް ނިންމައި އެކަމާ ގުޅިގެން ރައްޔިތުންގެ ހިޔާލު ހޯދުމުގެ ވޯޓަކަށް ދިއުމަށް ނިންމާފައިވާ މި ދަނޑިވަޅުގައި އިދިކޮޅު ފަރާތްތަކުން އަމާޒުކުރަމުންދާ ފާޑުކިޔުންތަކަށް ރައްދު ދެއްވައި "ދިވެހީންގެރާއްޖެ" ޕްރޮގްރާމުގައި މެމްބަރު ވިދާޅުވީ މިކަމުގެ ސަބަބުން ލިބޭނެ އެންމެ ބޮޑު އެއް ފައިދާއަކީ ގައުމުގައި ސިޔާސީ ހަމަޖެހުން ގާއިމުވެގެން ދިއުން ކަމަށެވެ. 

ދެހާސް އަށް ވަނަ އަހަރު ރާއްޖެއަށް ޑިމޮކްރަސީ އައި ފަހުން ރާއްޖޭގެ ސިޔާސީ މަސްރަހު އަބަދުވެސް ފެންނަނީ ވަރަށް ހަލަބޮލިކޮށް ކަމަށާއި އެކަން އެހެން ވަނީ އިންތިހާބުތައް ގިނަވުމުގެ ސަބަބުން ކަމަށެވެ. 

ރައްޔިތުން ބޭނުންވާ ތަރައްގީ ހޯދައިދޭންޖެހޭނީ އިންތިހާބުތައް ބޯމަތިވީމަ އެކަނި ނޫން ކަމަށާއި ދެ އިންތިހާބު އެއް ދުވަހެއްގައި ބޭއްވި ނަމަވެސް ސަރުކާރުގެ ޕްލޭންތަކެއް ހުރިނަމަ ކަންކަން ދާނީ ރަނގަޅަށް ކަމަށާއި ދެ އިންތިހާބު އެއް ދުވަހެއްގައި ބޭއްވުމުގެ ސަބަބުން އިސްރާފު ކުޑަކުރެވި، ގައުމަށް ހަމަޖެހުން އަންނާނެ ކަމަށް މެމްބަރު ވިދާޅުވި އެވެ. 

ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށްޓަކައި، ރައްޔިތުންގެ މަޖިލީހުން ފާސްކުރައްވައިފައިވާ "ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އަށް ވަނަ އިޞްލާޙު ގެނައުމުގެ ބިލު" ތަޞްދީޤުކުރެއްވުމުގެ ކުރިން، ރައްޔިތުންގެ ޚިޔާލު ހޯދުމުގެ ޢާންމު ވޯޓެއް ނެންގެވުމަށް ރައީސުލްޖުމްހޫރިއްޔާގެ ޤަރާރަކުން ވަނީ ނިންމަވާފަ އެވެ.

މި ބިލަށް ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގައި ބަޔާންކޮށްފައިވާ ގޮތުން، ރައްޔިތުންގެ ޚިޔާލު ހޯދުމަށް އެދި ހުށަހަޅާ ސުވާލަކީ "ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެކުގައި ބޭއްވުމަށާއި، ރައްޔިތުންގެ މަޖިލީހުގެ އުމުރު ގުނުމުގެ އުސޫލު ބަޔާންކުރުމަށް ޓަކައި، ރައްޔިތުންގެ މަޖިލީހުން ފާސްކުރައްވައިފައިވާ ބިލު ރައީސުލްޖުމްހޫރިއްޔާ ތަޞްދީޤުކުރެއްވުމަށް ފެނޭ ހެއްޔެވެ؟" މި ސުވާލެވެ.

ދެ އިންތިހާބުގެ ރެފަރެންޑަމް އޮންނާނީ ކައުންސިލު އިންތިހާބާ އެކު އަންނަ އޭޕްރީލްމަހުގެ ހަތަރު ވަނަ ދުވަހު އެވެ.