މިއަދު ލާމަރުކަޒީ ނިޒާމާމެދު އޮތް އެންމެ ބޮޑު ހިތްހަމަޖެހުމަކީ ރައްޔިތުން އެ ނިޒާމު ބަލައިގަނެފައިވުންކަމަށް ސިޓީތަކާއި އިދާރީ ދާއިރާތަކުގެ ހިންގުމާއި އާއްމު މަސައްކަތްތަކާ ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ. 

 މިއަދު ފާހަގަކުރާ ލާމަރުކަޒީ ނިޒާމުގެ ދުވަހުގެ މުނާސަބަތާ ގުޅިގެން މިނިސްޓަރ އާދަމް ޝަރީފް ޢުމަރު ވިދާޅުވީ ރާއްޖެއަށް ލާމަރުކަޒީ ނިޒާމު ތައާރަފުވިތާ 15 އަހަރު ވެފައިވާއިރު އެ ނިޒާމު އެތައް ތަޖުރިބާއެއް ކޮށްފައިވާ ކަމަށެވެ. އެގޮތުން ނިޒާމު ވުޖޫދުވުމަށްފަހު ފުރަތަމަ މަރުޙަލާގައި ކުރިމަތިވި ގޮންޖެހުންތަކާމެދު މިއަދު ވިސްނާލުން މުހިއްމު ކަމަށްވެސް ވަޒީރު ވިދާޅުވިއެވެ. 

ވަޒީރުވަނީ އެއިރު ރައްޔިތުން އެ ނިޒާމު ބަލައިގަތް މިންވަރާއި، އެ ނިޒާމުގެ ސަބަބުން ލިބޭނެ ކުރިއެރުންތަކާމެދު ރައްޔިތުންގެ މެދުގައި ހޭލުންތެރިކަން އޮތީ ކިހައިވަރަކަށްތޯ ސުވާލު އުފައްދަވާފައެވެ. އަދި ލާމަރުކަޒީ ނިޒާމު ތައާރަފުވެގެން އައިއިރު އެ ނިޒާމު ހިންގުމަށްޓަކައި ގިނަ ޕާޓީ ހިމެނޭ ނިޒާމުގެ ތެރެއިން މީހުން ބިނާކުރެވިފައި ހުރިތޯވެސް ވަޒީރު ސުވާލު އުފެއްދެވިއެވެ. 

ލާމަރުކަޒީ ނިޒާމަކީ އޭގެ ތަބީއަތުގައި ރައްޔިތުންނާ އެންމެ ގާތުން ހިދުމަތް ދެވޭނެ ނިޒާމުކަން ފާހަގަކުރައްވަމުން ވަޒީރު ވިދާޅުވީ މި ނިޒާމުގެ ތެރެއިން ހިދުމަތް ފޯރުކޮށްދިނުމަށް މަސައްކަތްކުރާއިރު، މި ނިޒާމުގައި ރަށްރަށުގައި ހުންނާނެ އެންމެ އިސް މުއައްސަސާއަކީ ކައުންސިލުތައްކަން ދައުލަތުގެ ވުޒާރާތަކާއި ހުރިހާ އިދާރާއަކުންވެސް ގަބޫލުކުރަންޖެހޭ ކަމަށް ވަޒީރު ވިދާޅުވިއެވެ. 

ވަޒީރު އިތުރަށް ވިދާޅުވީ ކައުންސިލުތަކުގެ ދައުރަކީ އެއިރެއްގައި އޮންނަ ސަރުކާރަކުން ދޭ ހިދުމަތްތަައް ރައްޔިތުންނާ ހަމައަށް ވާސިލުކޮށްދިނުމުގައި އެންމެ މުހިއްމު ބައިވެރިއެއްގެ ދައުރު އަދާކުރުންކަން ގަބޫލުކޮށް އެފިކުރު ރާއްޖޭގައި އާލާކޮށް ދިރުވަންޖެހޭ ކަމަށެވެ. 

ލާމަރުކަޒީ ނިޒާމު ހިންގުމުގައި ރައްޔިތުންގެ ބައިވެރިވުމާއި ޝާމިލުވުން އޮތުން މުހިއްމުކަން ފާހަގަކުރައްވައި އާދަމް ޝަރީފު ވިދާޅުވީ ރައްޔިތުންނާ ގާތުން، ރައްޔިތުން ބައިވެރިކޮށްގެން ވެރިކަން ހިންގެވުމުގެ ނަމޫނާ ރައީސް ޑރ.މުޙައްމަދު މުޢިއްޒު ގެންދަވަނީ ދައްކަވައިދެއްވަމުން ކަމަށެވެ. އެގޮތުން އެމަނިކުފާނު ހުރިހާ ރަށަކަށް ކުރެއްވި ޒިޔާރަތުގައި ކައުންސިލުތަކާއި ރައްޔިތުންނާ ބައްދަލުކުރައްވައި ހުރިހާ ކަމެއްގައި ރައްޔިތުންގެ ހިޔާލާއި މަޝްވަރާ ހޯއްދެވިކަން ވަޒީރު ފާހަގަކުރެއްވިއެވެ.