މާލޭގެ ތަރައްގީގެ ޕްރޮޖެކްޓުތައް ހުރީ މާލޭގެ މޭޔަރު އާދަމް އާޒިމުގެ މޭޒުމަތީގައި ޕާކުކޮށްފައި ކަމަށް މާލޭގެ ޑެޕިއުޓީ މޭޔަރު މުޙައްމަދު އަރީޝް ވިދާޅުވެއްޖެ އެވެ. 

ސިޓީ ކައުންސިލުގެ ހަތަރު ވަނަ ދައުރުގެ 235 ވަނަ ރަސްމީ އާއްމު ޖަލްސާގައި މާލޭގެ ތަރައްގީގެ ދުވެލި މަޑުޖެހިފައިވާތީ އެކަމުގެ ކަންބޮޑުވުން ފާޅުކުރައްވައި އަރީޝް ވިދާޅުވީ އާދަމް އާޒިމް މާލޭގެ މޭޔަރުކަމާ ހަވާލުވެވަޑައިގެންނެވި ފުރަތަމަ ދުވަހުން ފެށިގެން މާލޭގެ ކަންކަން ބޮއްސުންލާން ފަށާފައި ވާކަމަށެވެ. 

މާލޭ ސިޓީ ކައުންސިލުން ނިންމާ ކަންކަމަކީ ޕީއެންސީ ކައުންސިލަރުންގެ ފުރިހަމަ ތާއީދާ އެކު ނިންމަމުންދާ ކަންކަން ކަމަށް އަރީޝް ވިދާޅުވި އެވެ. 

ޕީއެންސީގެ ކައުންސިލަރުން ބައިވެރި ނުކޮށް ސިޓީ ކައުންސިލުން ދެ ޕްރޮޖެކްޓެއް ކުރިއަށް ގެންދާއިރު އެ ޕްރޮޖެކްޓުތަކުގެ ދުވެލި ވަރަށް ލަސް ކަން އަރީޝް ފާހަގަކުރެއްވި އެވެ. 

ސިޓީ ކައުންސިލުގެ ބެލުމުގެ ދަށުން މާލޭގައި މިފަހުން އިފްތިތާހުކުރެވިގެންދިޔަ ބައެއް މަޝްރޫއުތަކަކީ ސީދާ ޕީއެންސީގެ ކައުންސިލަރުންގެ ބެއްލެވުމުގެ ދަށުން ކުރިއަށްގެންދިޔަ ކަންތައްތަކެއްކަން ފާހަގަކުރައްވައި، އެ ކައުންސިލަރުންނަށް ދޭންވާ ހައްގު ކްރެޑިޓް ނުދޭތީ ވެސް އަރީޝް ވަނީ ނުރުހުން ފާޅުކުރައްވާފައެވެ. 

އަރީޝްގެ އެ ވާހަކަފުޅާއެކު މޭޔަރު އާޒިމް ވަނީ އަރީޝްގެ ވާހަކަފުޅު ހުއްޓުވައިލެއްވުމަށް މަސައްކަަތްކުރައްވާފައެވެ. ނަމަވެސް އަރީޝް ވިދާޅުވީ މިވަރަށް ކަންކަން ސާފުކޮށްދޭން ޖެހެނީ ޕީއެންސީ ކައުންސިލަރުންގެ އަގު ވައްޓާލަން އާޒިމް މަސައްކަތް ކުރައްވާތީ ކަމަށެވެ. 

ދާއިރާތަކުގެ މައްސަލަތައް ބެލުމަށްފަހު އެކަންކަން ހައްލުކުރަން ޕްލޭންތައް ހަދައި މޭޔަރަށް ފޮނުވުމުން، އެކަން ކުރީ ޕީއެންސީގެ ކައުންސިލަރުންނަށް ވާތީ އެ ޕްރޮޖެކްޓުތައް މޭޔަރުގެ މޭޒުމަތީގައި ޕާކު ކުރާކަމަށް އަރީޝް ތުހުމަތުކުރެއްވިއެވެ. 

ކައުންސިލަރުން ކަންކަން ކުރާއިރު އެ ކަންކަން ތަންފީޒު ނުކޮށް އެބޭފުޅުންގެ އަބުރަށް ހުތުރުވާގޮތަށް އާޒިމް ވާހަކަ ނުދެއްކެވުމަށް ވެސް އަރީޝް ގޮވާލެއްވި އެވެ. 

އަރީޝްގެ ވާހަކަފުޅުތަކަށް އާޒިމް އިންކާރު ކުރެއްވުމުން އަރީޝް ވިދާޅުވީ އޭނާ އެ ވިދާޅުވާ ކަންކަމުގެ ހަގީގަތް ބެލުމަށް ކައުންސިލުގެ ލޭންޑް ކޮމިޓީ ބޭފުޅުންނާ ސުވާލުކުރުމަށެވެ. 

މާލޭގެ ތަރައްގީއަށް ހުރަސް އަޅާ ކަމުގެ ތުހުމަތާއެކު މާލޭގެ މޭޔަރު އާޒިމާއި ޑެޕިއުޓީ މޭޔަރު އަރީޝްއާދެމެދު ބަހުގެ ހަމަލާތައް ބަދަލުކުރެވުނު އިރު މާލޭގެ ކަންކަން ރަނގަޅުކޮށް މާލެއަށް ބޭނުންވާ ތަރައްގީ ގެނައުމުގައި ސަރުކާރުގެ ޕްލޭންތަކަށް އާޒިމް އެއްބާރުލުން ނުދެއްވާ ވާހަކަތައް އަންނަނީ ފެންމަތިވަމުން ނެވެ.