މިހާރު މާލޭގެ މޭޔަރުކަމުގެ މަގާމުގައި ހުންނެވި އެމްޑީޕީ އަށް ނިސްބަތްވެވަޑައިގަންނަވާ އާދަމް އާޒިމްގެ ފަރާތްޕުޅުން އެއްބާރުލުން ނުލިބޭ ކަމަށް ވިދާޅުވެ، މާލޭ ސިޓީ ކައުންސިލުން ކުރަންޖެހޭ ކަންކަން ވެސް މިހާރު ކުރަން ޖެހެނީ ވުޒާރާއަށް ކަމަށް އިމާރާތްކުރުމާއި ބިނާރާ ބެހޭ ވަޒީރު އަބްދުﷲ މުއްޠަލިބް ވިދާޅުވެއްޖެ އެވެ. 

ކައުންސިލް އިންތިހާބުގައި ޕީއެންސީއަށް ރައްޔިތުންގެ ތާއީދު ހޯދުމަށް ކުރިއަށް ގެންދާ ޑޯޓުޑޯ ހަރަކާތުގައި ޕާޓީގެ ލީޑަރުގެ ހައިސިއްޔަތުން މިއަދު ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ބައިވެރިވެވަޑައިގެންފަ އެެވެ. 

އެ ހަރަކާތުގެ ތެރެއިން "އެމްއެމްޓީވީ"އަށް ދެއްވި ބަސްދީގަތުމެއްގައި ވަޒީރު ވިދާޅުވީ ރައްޔިތުންގެ އާއްމު ދިރިއުޅުމާ ގުޅުންހުރި ގިނަ ކަންކަން މާލޭ ސިޓީ ކައުންސިލު މެދުވެރިކޮށް ކުރަން ހަމަޖެހިފައި ވީ ނަމަވެސް މިހާރު އޮތް ކައުންސިލުގެ މޭޔަރު އެކަންކަން ކުރައްވަން މާ ބޮޑު އިސްކަމެއް ދީފައި ނުވާތީ، ރައްޔިތުންނަށް ކުރިމަތިވާ ހުރަސްތައް ނައްތާލުމަށް އެކަންކަން ކުރަން ޖެހެނީ ވުޒާރާގެ ފަރާތުން ކަމަށެވެ.

ވުމާއެކު، ރައްޔިތުންގެ ލާބައާއި މަންފާއަށްޓަކައި ކުރާ މިފަދަ ކަންކަމުގައި ކައުންސިލުގެ އެއްބާރުލުން ބޭނުންވާ ކަމަށާއި މާލޭ ސިޓީ ކައުންސިލް ކޮންގްރެސް ޕާޓީއަށް ލިބިގެން ދިއުމަކީ މާލޭގެ ކުރިއެރުމަށް އެޅިގެންދާނެ މުހިންމު ފިޔަވަޅެއްކަމަށް ވަޒީރު ވިދާޅުވި އެވެ.