ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ގެ ވިމެންސް ކަޕްގެ ފައިނަލުގައި މިރޭ ފަހަތުންއަރައި ރާއްޖެ ބަލިކޮށް، ކިރްގިސްތާނުން އެ މުބާރާތުގެ ޗެމްޕިއަންކަން ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު ފައިނަލް މެޗުގައި ކިރްގިސްތާނުން ވަނީ 3-1 ސެޓުން ރާއްޖެ ބަލިކޮށްފައެވެ.

މި މެޗުގެ ފުރަތަމަ ސެޓު ފެށިގެން ބޮޑުބައިގައި ކިރްގިސްތާނުން ލީޑު ކުރަމުންދަނިކޮށް، ރާއްޖޭން ވަނީ 18-18 އިން އެއްވަރުކުރުމަށްފަހު، އޭގެފަހުން ނެގި ލީޑާއެކު 25-20 އިން އެ ސެޓު ކާމިޔާބުކޮށްފައެވެ.

ދެން ކުޅެވުނު ދެވަނަ ސެޓުގައި ގިނަ ވަގުތު ރާއްޖޭން ލީޑު ނަގައިގެން ކުޅެފައިވާއިރު، ކިރްގިސްތާނުން ވަނީ 22-22 އިން އެއްވަރުކޮށް، އެއަށްފަހު ފުލުފުލުގައި ހޯދި ޕޮއިންޓްތަކާއެކު 25-22 އިން ކުރިހޯދައި، މެޗުގެ ނަތީޖާ ހަމަހަމަކޮށްފައެވެ.

އެއަށްފަހު، ދެން ކުޅެވުނު ތިންވަނަ ސެޓުގެ ބޮޑުބައިގައި ދެ ޓީމުގެ ފަރާތުން ވަރަށް އެއްވަރު ކުޅުމެއް ފެނިގެންދިޔަނަމަވެސް، ފަހު ބައިގައި ފަސް ޕޮއިންޓްގެ ލީޑެއްނަގައި، ކިރްގިސްތާނުން މި ސެޓު ކާމިޔާބުކުރީ 25-17 އިންނެވެ.

މެޗުގެ ހަތަރުވަނަ ސެޓު ފެށިގެން ކިރްގިސްތާނުން ލީޑުކުރަމުންދަނިކޮށް، ރާއްޖޭން ވަނީ އެއްވަރުކުރުމަށްފަހު ލީޑު އަތުލާފައެވެ. އެއަށްފަހު، މި ސެޓުގެ ވަރަށް ފަހަކާ ޖެހެންދެން ރާއްޖޭން އޮތީ ލީޑުގައެވެ.

އެގޮތުން، 17-12 އިން ރާއްޖެ ލީޑުގައި އޮއްވާ، ކިރްގިސްތާނުން ވަނީ ފުލުފުލުގައި ހޯދަމުންދިޔަ ޕޮއިންޓްތަކާއެކު، ދެ ޓީމުގެ ފަރަގު ކުޑަކޮށް، 18-18 އިން އެއްވަރުކޮށްފައެވެ. އެއަށްފަހު، މި ސެޓުގައި އެ ޓީމުން ކޮންޓްރޯލް އަތުލައި ނެގި ލީޑު ދަމަހައްޓަމުންގޮސް، 25-21 އިން ކުރިހޯދައި، މެޗު ކާމިޔާބުކުރިއެވެ.

ފައިނަލް މެޗަށްފަހު ޝަރަފުވެރި މެހެމާނާ، ރައީސުލްޖުމްހޫރިއްޔާގެ އަނބިކަނބަލުން، ސާޖިދާ މުޙައްމަދު ވަނީ ޗެމްޕިއަން ޓީމަށް މެޑެއްޔާއި، ޓްރޮފީ ދެއްވާފައެވެ.

މުބާރާތުގެ ޗެމްޕިއަންކަން ކިރްގިސްތާނުން ހޯދިއިިރު، ރަނަރަޕް މަގާމު ލިބުނީ ރާއްޖެ އަށެވެ. މި މުބާރާތުގެ ތިންވަނަ މަގާމު ހާސިލްކުރީ ބަންގްލަދޭޝް އެވެ. އެ ޓީމުން ވަނީ މިއަދު ހަވީރު ކުޅެވުނު ތިންވަނަ ހޮވާ މެޗުގައި ސީދާ ތިން ސެޓުން އަފްޣާނިސްތާން ބަލިކޮށްފައެވެ.

މުބާރާތުގެ ފަހުރުވެރި ވަނަތައް:

އެމްވީޕީ: ނުރްޒަމާލް ބޮލޮޓްބެކޯވާ (ކިރްގިސްތާން)

ބެސްޓް އައުޓްސައިޑް ހިޓާ: ނުރްޒަމާލް ބޮލޮޓްބެކޯވާ (ކިރްގިސްތާން)

ބެސްޓް އައުޓްސައިޑް ހިޓާ: ހައްވާ ރާޝިދާ (ދިވެހިރާއްޖެ)

ބެސްޓް މިޑްލްބްލޮކަރ: ސައިކަލް އަމިރަކުލޯވާ (ކިރްގިސްތާން)

ބެސްޓް މިޑްލްބްލޮކަރ: ނަރީމާ އިދުރީސް (ދިވެހިރާއްޖެ)

ބެސްޓް ސެޓަރ: ޖޫޒަން ޒަރީރު (ދިވެހިރާއްޖެ)

ބެސްޓް އޮޕޮސިޓް ޕްލެއަރ: ޝަހާ ޝާމިން (ދިވެހިރާއްޖެ)

ބެސްޓް ލިބެރޯ: އަސެމާ ސެއީޓްބްރްލޯވާ (ކިރްގިސްތާން)