ENGLISH

30 އޯގަސްޓު 2025

Advertisement

12 އަހަރުގެ ލައިބާ ސީނިއާ ބެޑްމިންޓަން ޓީމަށް

13 އޯގަސްޓު 2025

|

މުޙައްމަދު އަދުހަމް

ނައިފަރު ބެޑްމިންޓަން މުބާރާތުގައި ލައިބާ ކުޅެނީ. ފޮޓޯ: ބެޑްމިންޓަން އެކަޑެމީ އޮފް ނައިފަރު

ދިވެހިރާއްޖޭގެ ބެޑްމިންޓަން ތާރީޚުގައި ފުރަތަމަ ފަހަރަށް އެކި ކަންކޮޅުތަކަށް ހުޅުވާލެވިގެން ބޭއްވުނު ޤައުމީ ސްކޮޑުގެ ޓްރަޔަލްސްގައި، ވާދަކޮށް އުމުރުން 12 އަހަރުގެ ލައިބާ އަހުމަދު މަހުލޫފް (އެލީ) ޓީމުން ޖާގަ ހޯދައިފިއެވެ.

މި އޮގަސްޓް މަހުގެ 11 އިން 13 ގެ ނިޔަލަށް ކުޅިވަރު އެކުވެނީގެ އިންޑޯ ބެޑްމިންޓަން ކޯޓުގައި ކުރިއަށްދިޔަ ސިލެކްޝަން ޓްރަޔަލްގައި ވަނީ، މާލެ ސިޓީ، ބ. އޭދަފުށި ޅ. ނައިފަރު އަދި އައްޑޫ ސިޓީ ހިމެނޭ ގޮތަށް ދެ ޖިންސުން މުޅިއެކު 50 އަށް ވުރެ ގިނަ ކުޅުންތެރިން ވާދަކޮށްފައެވެ.

މިއަދު ކުރިއަށްދިޔަ ސިލެކްޝަންގެ ފަހު މެޗުތަކަށްފަހު ލައިބާ ވެގެން ގޮސްފައިވަނީ ގްރޫޕް ސްޓޭޖުގައި ކުޅުނު ހުރިހާ މެޗެއް ކާމިޔާބުކޮށް، ސީނިއާ ސްކޮޑުން އެންމެ ހަގު އުމުރުގައި ޖާގަ ހޯދި އެއް ކުޅުންތެރިޔާ އަށެވެ.

މީގެކުރީން، ލައިބާ ވަނީ، ދުނިޔޭގެ އެކި ޤައުމުތަކުގައި ކުރިއަށްދިޔަ ޖޫނިއާ ބެޑްމިންޓަން މުބާރާތްތަކުގައި ވާދަކޮށް، ރަނގަޅު ކާމިޔާބީއަކާއެކު މެޑެލް ހާސިލްކޮށްފައެވެ.

ލައިބާގެ އިތުރުން މި ފަހަރުގެ ޤައުމީ ސްކޮޑުގެ ދެން ހިމެނެނީ؛ ރިވައިވަލް ސްޕޯޓްސް ކްލަބުގެ ފާތިމަތު ނަބާހާ ޢަބްދުއްރައްޒާޤް، އައިމިނަތު ނަބީހާ ޢަބްދުއްރައްޒާޤް، އައިޝަތު އާލިޝާ މޫސާ އާއި ޝުބާ މުޙައްމަދު ޝަރީފް އަދި ޔަލްވީ ހުސެއިން ޒުހުރީ އެވެ.

ފިރިހެން ޓީމުގައި ހިމެނެނީ؛ ރިވައިވަލްގެ ޒަޔާން ހުސެއިން ޝަހީދު ޒަކީ، އަހުމަދު ނިބާލް، ހަސަން ޒަޔާން މުޙައްމަދު އާއި ހައިޝަމް އިބްރާހިމް އަލީ އަދި އާދަމް މަހީން މުޙައްމަދުގެ އިތުރުން ބެޑްމިންޓަން އެކެޑަމީ އޮފް ނައިފަރުގެ އިބްރާހިމް ނާޝިތު ހަމްދީ އެވެ.

މިފަހަރުގެ ޤައުމީ ސިލެކްޝަނުން ހޮވުނު، ކުޅުންތެރިންނަށް އެ ކުޅުންތެރިންގެ އަމިއްލަ އެކަޑަމީ އާއި ކްލަބްގެ އިތުރުން ރާއްޖޭން ބޭރުގައި ވެސް ފަރިތަކުރުންތައް ކުރިއަށްގެންދިއުމުގެ ފުރުޞަތު ވަނީ ދީފައެވެ.

ކިޔުންތެރިންގެ ހިޔާލު