ބ. ތުޅާދޫގައި ކުޅިވަރުގެ ދާއިރާއިން ކޮށްދޭން ވެފައިވާ ވަޢުދުތަކުގެ ތެރެއިން ހޭންޑްބޯޅަ ކޯޓަކާއި ފުޓްސަލް ދަނޑެއްގެ މަސައްކަތްތައް މިއަހަރުގެ ތެރޭގައި ފަށާނެ ކަމަށް ރައީސުލްޖުމްހޫރިއްޔާ، ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެ މަނިކުފާނު މިކަން އިޢްލާންކުރައްވާފައިވަނީ، މާޅޮސްމަޑުލު ދެކުނުބުރީގެ މީހުން ދިރިއުޅޭ ރަށްރަށަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ހެނދުނު، އެ އަތޮޅު ތުޅާދޫ އަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.

އެގޮތުން، ރައީސް ޑރ. މުޢިއްޒު ވަނީ، ކުޅިވަރުގެ ދާއިރާއިން ތުޅާދޫގެ ރައްޔިތުންނަށް ވެފައިވާ ވަޢުދުތަކުގެ ތެރެއިން އަންހެން ބޭފުޅުންނަށް ޚާއްޞަ ކުޅިވަރެއްގެ ގޮތުގައި ފާހަގަކުރެވޭ ހޭންޑްބޯޅަ ކުޅުމަށް ކޯޓެއް އަޅައިދިނުމުގެ މަސައްކަތް ވަރަށް އަވަހަށް ފައްޓަވާނެ ކަމުގެ ޔަޤީންކަން ދެއްވައިފައެވެ.

އަދި، އޭގެއިތުރަށް، ފުޓްސަލް ދަނޑުގެ ސައިޒު ބޮޑުކޮށްދިނުމަށްޓަކައި، ބޮޑު ސައިޒުގެ އައު ފުޓްސަލް ދަނޑެއް އެޅުމުގެ މަސައްކަތް ކުރިއަށްގެންދާނެ ކަމަށް ރައީސް ވިދާޅުވިއެވެ.

"އެހެންވީމާ، ހޭންޑްބޯޅަ ކޯޓަކާއި ބޮޑު ފުޓްސަލް ދަނޑެއްގެ މަޝްރޫޢު ކުރިއަށް އޮތް ތާނގާއި މިއަހަރު ތެރޭގައި ފަށައިދޭނަން،" ރައީސް ވިދާޅުވިއެވެ.