އޭއެފްސީ ޗެލެންޖް ލީގު (އޭސީޖީއެލް) ގެ ޕްރެލިމިނަރީ ސްޓޭޖުގައި މާދަމާ ކުވެއިތުގެ އަލް އަރަބި ސްޕޯޓްސް ކްލަބާ ދެކޮޅަށް މާޒިޔާ ސްޕޯޓްސް އެންޑް ރެކްރިއޭޝަން ކްލަބު ކުޅޭ މެޗަކީ ރާއްޖޭގެ ފުޓްބޯޅައަށް މުހިއްމު މެޗެއް ކަމަށް ކޯޗު، ލުއިސްމާ ހެނާންޑޭޒް ބުނެފިއެވެ.

މާޒިޔާގެ ކޯޗު، ހެނާންޑޭޒް މިހެން ބުނީ، އަރަބިއާ ދެކޮޅަށް ކުޅުމަށް ހަމަޖެހިފައިވާ މެޗުގެ ކުރީން ގަލޮޅު ރަސްމީ ދަނޑުގައި މިއަދު ބޭއްވި ނޫސްވެރިންގެ ބައްދަލުވުމުގައެވެ.

ހެނާންޑޭޒް ބުނީ، މާޒިޔާ އޮތީ މެޗަށް ވަރަށް ރަނގަޅަށް ތައްޔާރުވެފައި ކަމަށާއި، މިއީ އެ ކުލަބުގެ އިތުރުން މުޅި ޤައުމަށް ވެސް މުހިއްމުކަން ބޮޑު މެޗެއް ކަމަށެވެ.

ހެނާންޑޭޒްގެ ވާހަކައިގައިވަނީ، މާޒިޔާ އަށް މެޗު ކާމިޔާބުކޮށްދޭން އޭނާ އަށް މަޖުބޫރުވެފައިވާ ކަމަށާއި، އެއީ އެ ޓީމުގައި ރާއްޖޭގެ ސީނިއާ ޓީމަށް ނިސްބަތްވާ ގިނަ ކުޅުންތެރިންތަކެއް ތިބުމުން ކަމަށް ވެސް ބުނެފައިވެއެވެ.

މިދިޔަ ހަފްތާތަކުގައި މާޒިޔާ އިން އެޓޭކުގެ އިތުރުން ޑިފެންސްގެ ކަންކަން ރަނގަޅު ކުރުމަށް ގިނަ މަސައްކަތްތަކެއް ކޮށްފައިވުމާއެކު ކުރިއަށްވުރެ ހުރިހާ ކަމެއް ވެސް ރަނގަޅުވާނެ ކަމަށް ވެސް އޭނާ ބުންޏެވެ.

މި މެޗަކީ ދެ ޓީމަށް ވެސް ވަރަށް އުނދަގޫ މެޗަކަށް ވާނެ ކަމަށާއި، އޭނާގެ ޓީމަށް މެޗު ކާމިޔާބުކުރުމަށްޓަކައި ރަނގަޅަށް ޑިފެންސްކުރުން މުހިއްމު ކަމަށް ހެނާންޑޭޒް ބުންޏެވެ.

އޭއެފްސީ ޗެލެންޖް ލީގުގެ ގުރޫޕް ސްޓޭޖުގައި މާޒިޔާއިން ވަނީ މިދިޔަ އަހަރު ވެސް އަލް އަރަބިއާ ދެކޮޅަށް ކުޅެފަ އެވެ. އެ ފަހަރު ކުވެއިތުގައި ސެންޓްރަލައިޒްކޮށް ކުޅުނު ގްރޫޕް ސްޓޭޖު މެޗުން އަރަބި އަތުން މާޒިޔާ ބަލިވީ 2-0 އިންނެވެ.

ހެނާންޑޭޒް ބުނީ، އަރަބިއާ ދެކޮޅަށް ކުޅޭ މެޗަށް ނިކުންނައިރު އޭނާގެ ޓީމުގެ ހުރިހާ ކުޅުންތެރިންނާ މެދު ވަރަށް ބޮޑު އިތުބާރެއް އެބައޮތް ކަމަށާއި، ފަސޭހަކޮށްލައިގެން ފަރުޖެއްސެން ނެތް ކަމަށެވެ.

އޭއެފްސީ ޗެލެންޖް ލީގުގެ ގްރޫޕް ސްޓޭޖުގެ ޖާގައެއް ހޯދުމަށް މާޒިޔާއާ އަރަބި ބައްދަލުކުރާ މެޗު ފެށުމަށް ހަމަޖެހިފައިވަނީ މާދަމާ މެންދުރު ފަހު ރާއްޖެގަޑިން ތިނެއް ޖަހާއިރު އެވެ.