ރާއްޖޭގެ ސްވިމިންގ ޓީމުން ފެތުމުގެ ޤައުމީ ދެ ރެކޯޑެއް އާކޮށްފިއެވެ.

ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި ހަތަރެއް ގުނަ 100 މީޓަރު މިކްސްޑް މެޑްލޭ ރިލޭގެ އިތުރުން ފިރިހެނުންގެ ލޯންގކޯސް 100 މީޓަރު ފްރީސްޓައިލް އިވެންޓުގެ ޤައުމީ ރެކޯޑް ވަނީ އާކޮށްފައެވެ.

އެގޮތުން، ދުނިޔޭގެ ފެތުމުގެ މުބާރާތުގައި ދިވެހި ޓީމުން ވަނީ ހަތަރެއް ގުނަ ސަތޭކަ މީޓަރު މިކްސް މެޑްލޭ ރިލޭ އިވެންޓްގައި 04:40.23 އިން ރޭސް ނިންމައިގެން ޤައުމީ ރެކޯޑް އާކޮށްފައެވެ. މި ރޭހުގައި ވާދަކުރި ދިވެހި ޓީމުގައި ހިމެނެނީ؛ އަމްނާ ތަޒްކިޔާ މިރުޞާދު، މުޙައްމަދު އާން ޙުސައިން، މުޙައްމަދު ރިޙާން ޝިހާމް އަދި މިރާލް ޢައިން ލަޠީފް އެވެ.

މި އިވެންޓްގެ ޤައުމީ ރެކޯޑް އެންމެ ފަހުން އާކޮށްފައިވަނީ، މިދިޔަ އަހަރު ބޭއްވީ 21 ވަނަ ވޯލްޑް އެކުއަޓިކްސް ޗެމްޕިއަންޝިޕްސްގައި 04:41.83 އިން ރޭސް ނިންމައިގެންނެވެ. އެ މުބާރާތުގައި ވާދަކުރި ދިވެހި ޓީމުގައި ހިމެނުނީ؛ ހަމްނާ އަޙްމަދު، މުބާލް ޢައްޒާމް އިބްރާޙީމް، މުޙައްމަދު ރިހާން ޝިހާމް އަދި އައިޝަތު އުލްޔާ ޝާއިޤް އެވެ.

މީގެއިތުރުން، ސިންގަޕޫރުގައި މިހާރު ކުރިއަށްދާ ދުނިޔޭގެ ފެތުމުގެ މުބާރާތުގައި ރާއްޖޭގެ ސްވިމިންގ ޓީމުގެ އާން ޙުސައިން ވަނީ، ފިރިހެނުންގެ ލޯންގކޯސް 100 މީޓަރު ފްރީސްޓައިލް އިވެންޓުގައި 00:53.80 އިން ރޭސް ފުރިހަމަކޮށް، ރެކޯޑެއް އާކޮށްފައެވެ.

ކުރީން، މި ރެކޯޑް އޮތީ ވެސް އާން އަތުގައެވެ. އެއީ، މިދިޔަ އަހަރު ބޭއްވީ 66 ވަނަ މެލޭޝިއާ އޯޕަން ސްވިމިންގ ޗެމްޕިއަންޝިޕްސްގައި 00:54.46 އިން އިވެންޓް ފުރިހަމަކޮށްގެންނެވެ.

މިއީ މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ރާއްޖޭގެ ކުޅުންތެރިން ފެތުމުގެ ޤައުމީ ރެކޯޑެއް އާކުރި ފަސްވަނަ ފަހަރެވެ.

މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ދިވެހި ފެތުންތެރިން ވާދަކުރާ ފެތުމުގެ އިވެންޓްތައް ކުރިއަށްދާނީ ޖުލައި މަހުގެ 27 ވަނަ ދުވަހުން ފެށިގެން އޯގަސްޓް މަހުގެ 3 ވަނަ ދުވަހާ ހަމައަށެވެ.