ރާއްޖޭގެ ސްވިމިންގ ޓީމުގައި ހިމެނޭ މުޙައްމަދު ރިހާން ޝިހާމް ފެތުމުގެ ޤައުމީ ރެކޯޑެއް އާކޮށްފިއެވެ.

ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި ރާއްޖޭގެ ރިހާން ވަނީ، ފިރިހެނުންގެ ލޯންގކޯސް 200 މީޓަރު ބަޓަރފްލައި އިވެންޓުގެ ޤައުމީ ރެކޯޑެއް އާކޮށްފައެވެ.

ރިހާން މި ރެކޯޑް އާކޮށްފައިވަނީ، 02:25.20 އިން ރޭސް ނިންމައިގެންނެވެ.

ކުރީން މި ރެކޯޑް އޮންނަނީ ވެސް ރިހާން އަތުގައެވެ. އެއީ، 2023 ވަނަ އަހަރު ބޭއްވީ 19 ވަނަ އޭޝިއަން ގޭމްސްގައި 02:28.17 އިން ރޭސް ފުރިހަމަކޮށްގެންނެވެ.

މިއީ މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ރާއްޖޭގެ ކުޅުންތެރިން ފެތުމުގެ ޤައުމީ ރެކޯޑެއް އާކުރި ތިންވަނަ ފަހަރެވެ.

މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ދިވެހި ފެތުންތެރިން ވާދަކުރާ ފެތުމުގެ އިވެންޓްތައް ކުރިއަށްދާނީ ޖުލައި މަހުގެ 27 ވަނަ ދުވަހުން ފެށިގެން އޯގަސްޓް މަހުގެ 3 ވަނަ ދުވަހާ ހަމައަށެވެ.

މި ބައިނަލްއަޤްވާމީ މުބާރާތުގައި ދިވެހިރާއްޖެ ތަމްސީލުކުރާ ހުނަރުވެރި ފެތުންތެރިންނަކީ؛ ރިހާންގެ އިތުރުން އަމްނާ ތަޒްކިޔާ މިރުޞާދު، މިރާލް ޢައިން ލަތީފު އަދި އާން ހުސައިން އެވެ.