ރާއްޖޭގެ އެކި ކަންކޮޅުތަކަށް ހުޅުވާލައިގެން އަތޮޅު އަދި ސަރަހައްދީ މުބާރާތްތައް ހިމެނޭ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން މި އަހަރުގެ ކަލަންޑަރު އެކުލަވާލަން އެ އެސޯސިއޭޝަނަށް އަލަށް އިންތިހާބުވި އެގްޒެކެޓިވް ކޮމިޓީ އިން ނިންމައިފިއެވެ.

މިދިޔަ ހޮނިހިރު ދުވަހު ބޭއްވި އިންތިހާބީ ކޮންގްރެސް އަށް ފަހު އެފްއޭއެމްގެ ރައީސްގެ މަގާމަށް ވަޑައިގެންނެވި އަހުމަދު ޠާރިޤު (ޓޮމް) ގެ އެކްސްކޯގެ ފުރަތަމަ ބައްދަލުވުން ހޯމަ ދުވަހު ބޭއްވިއިރު، މުހިއްމު ގިނަ ނިންމުންތަކެއް ވަނީ ނިންމައިފައެވެ.

އެގޮތުން، އެފްއޭއެމްގެ އެކްސްކޯގެ މި ބައްދަލުވުމުގައި ނިންމި އެންމެ މުހިއްމު ނިންމުންތަކުގެ ތެރޭގައި، އަތޮޅާއި ސަރަހައްދީ ފުޓްބޯޅައިގެ ހަރަކާތްތައް މި އަހަރު ފެށުމަށް ނިންމާފައިވެއެވެ.

އެފްއޭއެމުން ނެރުނު ބަޔާނުގައިވަނީ، އެ އެސޯސިއޭޝަނުގެ އައު އަސާސީ ޤަވާއިދުގެ ދަށުން، ރީޖަނަލް އެސޯސިއޭޝަންތައް އުފެއްދުމުގެ ގޮތުން ރާއްޖޭގެ ހުރިހާ ރަށްތަކަށް ހުޅުވާލައިގެން އަތޮޅު، ޒޯން އަދި ރީޖަނަލް ފުޓްބޯޅަ މުބާރާތްތައް 2025/2026 ގެ އެފްއޭއެމްގެ ކަލަންޑަރުގައި ހިމަނަން ނިންމައި، މިއަހަރުގެ ތެރޭގައި ފަށަން ނިންމާފައިވާ ކަމަށެވެ.

އެފްއޭއެމްގެ އެކްސްކޯ އިން ދެން ނިންމި އެންމެ މުހިއްމު ނިންމުންތަކުގެ ތެރޭގައި، ދިވެހިރާއްޖޭގެ ފުޓްބޯޅައިގެ ހަރަކާތްތަކަށް 75 އަހަރު ފުރޭ އަހަރަކީ 2025 ވަނަ އަހަރު ކަމަށްވެފައި، އެކަން ކުލަގަދަކޮށް ފާހަގަ ކުރުމުގެ މަޤްޞަދުގައި އެފްއޭއެމްގެ އަސާސީ ޤަވާއިދުގައި ބަޔާންކުރާ ގޮތުގެ މަތީން އެކަމަށް ޚާއްޞަ ކޮމިޓީއެއް "ޑައިމަންޑް ޖުބުލީ ކޮމިޓީ" ނަމުގައި އުފައްދަން ނިންމުން ހިމެނެއެވެ.

އަދި، އެފްއޭއެމްގެ އަސާސީ ޤަވާއިދުގައި ބަޔާންކުރާ ގޮތުގެ މަތީން، "ފުޓްސަލް އެންޑް ބީޗް ސޮކަރ ކޮމިޓީ" ނަމުގައި ކޮމިޓީއެއް އުފައްދަން ވެސް ވަނީ ނިންމާފައެވެ.

އެފްއޭއެމްގެ އެކްސްކޯ އިން ދެން ނިންމި އިތުރު ނިންމުންތަކުގެ ތެރޭގައި، އަލަށް އެކުލަވާލެވޭ ފުޓްބޯޅަ ކަލަންޑަރާ މެދުގައި މަޝްވަރާކުރެވި، ކޮމިޓީތަކަށް މެންބަރުން އައްޔަންކުރެވެމުން، ފުޓްބޯޅަ ކަލަންޑަރާއި ދޭތެރޭގައި ގޮތެއް ނިންމަން ވެސް ނިންމާފައިވެއެވެ.

އަދި، ޤައުމީ ޓީމުތަކުގެ ބައިނަލްއަޤްވާމީ މުބާރާތްތަކެއް ކުރިއަށް ހުރި ދުވަސްތަކުގައި ހުރުމާއެކު، ޤައުމީ ޓީމުތަކުގެ ކޯޗުންނާއި އޮފިޝަލުން ކަނޑައަޅާނެ ގޮތާއިމެދު މަޝްވަރާކުރެވި، އަލަށް އެކުލަވާލެވޭ ކޮމިޓީތައް އެކުލަވާލެވުމުން ގޮތެއް ނިންމަން ވެސް އެކްސްކޯ އިން ބޭއްވި މި ބައްދަލުވުމުގައި ވަނީ މަޝްވަރާކުރައްވާފައެވެ.

މީގެއިތުރުން، އެފްއޭއެމްގެ އަސާސީ ޤަވާއިދުގައި ބަޔާންކުރާ ސްޓޭންޑިންގ ކޮމިޓީތަކަށް ބޭނުންވާ މެންބަރުންގެ ނަންތައް ހުށަހެޅުމުގެ ފުރުޞަތާއި އަލަށް އެކުލަވާލި ދެ ކޮމިޓީއަށް ނަންތައް ހުށަހެޅުމުގެ ފުރުޞަތު އެފްއޭއެމްގެ މެންބަރު ހުރިހާ ކުލަބުތަކަކަށް ހުޅުވާލަން ނިންމާފައިވާއިރު، މުއްދަތެއްގެ ގޮތުގައި އަންނަ އޮގަސްޓް މަހުގެ 3 ވަނަ ދުވަހު މެންދުރުފަހު 2:00 ގެ ކުރީން ނަންތައް ހުށަހެޅުމުގެ ސުންގަޑިކަމުގައި ވަނީ ކަނޑައަޅައިފައެވެ.