ރާއްޖޭގެ ސްވިމިންގ ޓީމުގައި ހިމެނޭ އުމުރުން 14 އަހަރުގެ އަމްނާ ތަޒްކިޔާ މިރުސާދު ފެތުމުގެ ޤައުމީ ރެކޯޑެއް އާކޮށްފިއެވެ.

ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި ރާއްޖޭގެ ޒުވާން ފެތުންތެރިޔާ، ތަޒްކިޔާ ވަނީ އަންހެނުންގެ 100 މީޓަރު ބެކްސްޓްރޯކް އިވެންޓުން ޤައުމީ ރެކޯޑެއް އާކޮށްފައެވެ.

ތަޒްކިޔާ މި ރެކޯޑް އާކޮށްފައިވަނީ، 01:13.49 އިން ރޭސް ފުރިހަމަކޮށްގެންނެވެ.

ކުރީން މި ރެކޯޑް އޮންނަނީ ހަމްނާ އަހުމަދު އަތުގައެވެ. އެއީ، 2024 ވަނަ އަހަރު މެލޭޝިއާގައި ކުރިއަށްދިޔަ 59 ވަނަ މައިލޯ/އެމްއޭއެސް މެލޭޝިއާ އިންވިޓޭޝަނަލް އޭޖްގްރޫޕް ސްވިމިންގ ޗެމްޕިއަންޝިޕްސްގައި  01:17.69 އިން ރޭސް ފުރިހަމަކޮށްގެންނެވެ.

މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ދިވެހި ފެތުންތެރިން ވާދަކުރާ ފެތުމުގެ އިވެންޓްތައް ކުރިއަށްދާނީ ޖުލައި މަހުގެ 27 ވަނަ ދުވަހުން ފެށިގެން އޯގަސްޓް މަހުގެ 3 ވަނަ ދުވަހާ ހަމައަށެވެ.

މި ބައިނަލްއަޤްވާމީ މުބާރާތުގައި ދިވެހިރާއްޖެ ތަމްސީލުކުރާ ހުނަރުވެރި ފެތުންތެރިންނަކީ؛ ތަޒްކިޔާގެ އިތުރުން މިރާލް ޢައިން ލަތީފް، އާން ހުސައިން އަދި މުޙައްމަދު ރިހާން ޝިހާމް އެވެ.