ރާއްޖޭގެ ސްވިމިންގ ޓީމުގައި ހިމެނޭ މިރާލް ޢައިން ލަތީފު ފެތުމުގެ ޤައުމީ ރެކޯޑެއް އާކޮށްފިއެވެ.

ސިންގަޕޫރުގައި މިހާރު ކުރިއަށްދާ 22 ވަނަ ވޯލްޑް އެކުއަޓިކްސް ޗެމްޕިއަންޝިޕްގައި ރާއްޖޭގެ މިރާލް ވަނީ އަންހެނުންގެ ލޯންގކޯސް 200 މީޓަރު އިންޑިވިޖުއަލް މެޑްލޭ އިވެންޓުން ޤައުމީ ރެކޯޑެއް އާކޮށްފައެވެ.

މިރާލް މި ރެކޯޑް އާކޮށްފައިވަނީ، 02:44.34 އިން ރޭސް ފުރިހަމަކޮށްގެންނެވެ.

ކުރީން މި ރެކޯޑް އޮންނަނީ ވެސް މިރާލް އަތުގައެވެ. އެއީ، މި އަހަރު ކުރީކޮޅު އިނގިރޭސިވިލާތުގައި ކުރިއަށްދިޔަ ޑެވަން ކައުންޓީ ޗެމްޕިއަންޝިޕްސްގައި 02:45.93 އިން ރޭސް ފުރިހަމަކޮށްގެންނެވެ.

މި ފަހަރުގެ ވޯލްޑް އެކުއަޓިކްސް ޗެމްޕިއަންޝިޕްގައި ދިވެހި ފެތުންތެރިން ވާދަކުރާ ފެތުމުގެ އިވެންޓްތައް ކުރިއަށްދާނީ ޖުލައި މަހުގެ 27 ވަނަ ދުވަހުން ފެށިގެން އޯގަސްޓް މަހުގެ 3 ވަނަ ދުވަހާ ހަމައަށެވެ.

މި ބައިނަލްއަޤްވާމީ މުބާރާތުގައި ދިވެހިރާއްޖެ ތަމްސީލުކުރާ ހުނަރުވެރި ފެތުންތެރިންނަކީ؛ މިރާލްގެ އިތުރުން އަމްނާ ތަޒްކިޔާ މިރުޞާދު، އާން ހުސައިން އަދި މުޙައްމަދު ރިހާން ޝިހާމް އެވެ.