ENGLISH

30 އޯގަސްޓު 2025

Advertisement

ޒަޔާން-ނިބާލްގެ ޕެއާ އާއި، ޒަޔާން-ނަބާ ގެ ޕެއާ އަށް ވެސް ރަން މެޑެލް

27 ޖުލައި 2025

|

މުޙައްމަދު އަދުހަމް

މުބާރާތުގައި ވާދަކުރި ރާއްޖޭގެ ކުޅުންތެރިން. ފޮޓޯ: ރިވައިވަލް ސްޕޯޓްސް

މެލޭޝިއާގެ 14 ވަނަ އެމްބީއޭ އިންޓަރނޭޝަނަލް ބެޑްމިންޓަން މުބާރާތުގެ އޯޕަން ކެޓަގަރީގެ ފިރިހެން ޑަބަލްސް ބައިން ރާއްޖޭގެ ޒަޔާން ޒަކީ އާއި ނިބާލް އަހުމަދުގެ ޕެއާގެ އިތުރުން މިކްސް ޑަބަލްސް ބައިން ޒަޔާން ޒަކީ އާއި ނަބާހާ ޢަބްދުއްރައްޒާޤު ޕެއާ ވެސް ރަން މެޑެލް ހާސިލްކޮށްފިއެވެ.

މުބާރާތުގެ އޯޕަން ބައިގެ ފިރިހެން ޑަބަލްސް ފައިނަލުގައި ރާއްޖޭގެ ރިވައިވަލް ސްޕޯޓްސްގެ ޕެއާ، ޒަޔާން ޒަކީ އާއި ނިބާލް ވަނީ އިންޑޮނޭޝިއާގެ ރިސްކި އަންތަސާރީ އާއި ސަޢޫދީ ޢަރަބިއްޔާގެ ރިކީ އަހުމަދު އަންދާ ފައުޒީގެ ޕެއާ ބަލިކޮށްފައެވެ. މި މެޗުން ރާއްޖޭގެ ޕެއާ މޮޅުވީ 31-28 އިންނެވެ.

މި ދެ ކުޅުންތެރިންގެ ޕެއާ ވަނީ މިދިޔަ އަހަރު ބޭއްވީ ބޮޓްސްވާނާ އިންޓަރނޭޝަނަލް މުބާރާތުގެ ފިރިހެން ޑަބަލްސް އިވެންޓުގައި ލޯ މެޑެލް ހާސިލްކޮށްފައެވެ.

މި މުބާރާތުގެ އޯޕަން ބައިގެ މިކްސް ޑަބަލްސް ޗެމްޕިއަންކަން ރާއްޖޭގެ ޒަޔާން ޒަކީ އާއި ނަބާހާގެ ޕެއާ ހޯދީ، ފައިނަލުގައި ސަޢޫދީ ޢަރަބިއްޔާގެ އޯރާ ޖޮވިތާން އާއި އިންޑޮނޭޝިއާގެ ރިސްކި އަންތަސާރީ ބަލިކޮށްގެންނެވެ. މި މެޗު ރާއްޖޭގެ ޕެއާ ކާމިޔާބުކުރީ 31-21 އިންނެވެ.

މުބާރާތުގައި ވާދަކުރި ރާއްޖޭގެ ކުޅުންތެރިން. ފޮޓޯ: ރިވައިވަލް ސްޕޯޓްސް

މުބާރާތުގައި ރާއްޖޭގެ ކުޅުންތެރިންގެ އިތުރު ކާމިޔާބީތަކަށް ބަލާއިރު، ނަބާހާ އާއި ނަބީހާގެ ޕެއާ އިން އަންހެން ޑަބަލްސް ބައިން ރަން މެޑެލް ހޯދިއެވެ.

ނަބާހާ ވަނީ އޯޕަން ބައިގެ އަންހެން ސިންގަލްސް އިން ރިހި މެޑެލް ހާސިލްކޮށްފައެވެ. މި އިވެންޓްގެ ސެމީގައި ބަލިވި ނަބީހާ ވަނީ ލޯ މެޑެލް ހޯދައިފައެވެ. ނިބާލް ވަނީ އޯޕަން ބައިގެ ފިރިހެން ސިންގަލްސް އިން ލޯ މެޑެލް ހާސިލްކޮށްފައެވެ

މީގެއިތުރުން، މުބާރާތުގެ އޯޕަން މިކްސް ޑަބަލްސް ސެމީގައި ވާދަކުރި ނިބާލް އާއި ނަބީހާގެ ޕެއާ ވަނީ ލޯ މެޑެލް ހާސިލްކޮށްފައެވެ.

މެލޭޝިއާގެ ސްޓޭޓް ލެވެލް މުބާރާތެއް ކަމަށްވާ، އެމްބީއޭ އިންޓަރނޭޝަނަލް ބެޑްމިންޓަން ޗެމްޕިއަންޝިޕްގެ ފޯމެޓް އޮތްގޮތުން ކުޅެނީ، 31 ޕޮއިންޓުން ނިމޭ ގޮތަށް އެއް ސެޓަށެވެ.

ކިޔުންތެރިންގެ ހިޔާލު