މެލޭޝިއާގެ 14 ވަނަ އެމްބީއޭ އިންޓަރނޭޝަނަލް މުބާރާތުގެ އޯޕަން ކެޓަގަރީގެ އަންހެން ޑަބަލްސް އިވެންޓްގެ ޗެމްޕިއަންކަން ރާއްޖޭގެ އައިމިނަތު ނަބީހާ ޢަބްދުއްރައްޒާޤު އާއި ފާތިމަތު ނަބާހާ ޢަބްދުއްރައްޒާޤުގެ ޕެއާ ހޯދައި، ރަން މެޑެލް ހާސިލްކޮށްފިއެވެ.

މުބާރާތުގެ އޯޕަން ބައިގެ އަންހެން ޑަބަލްސް ފައިނަލުގައި ރާއްޖޭގެ ރިވައިވަލް ސްޕޯޓްސްގެ ޕެއާ، ނަބާ އާއި ނަބީ ވަނީ 31-19 އިން ސްރީ ލަންކާގެ އަޗިނީ ނިމެޝިކާ އާއި މެލޭޝިއާގެ ނޯރް އައިދާގެ ޕެއާ ބަލިކޮށްފައެވެ.

މެލޭޝިއާގެ ސްޓޭޓް ލެވެލްގެ މުބާރާތެއް ކަމަށްވާ، އެމްބީއޭ އިންޓަރނޭޝަނަލް ބެޑްމިންޓަން ޗެމްޕިއަންޝިޕްގައި ރިވައިވަލް ސްޕޯޓްސް އިން ދެން ވާދަކުރަނީ ނިބާލް އަހުމަދު، ހުސައިން ޒަޔާން ޝަހީދު ޒަކީ އާއި ހަސަން ޒަޔާން މުޙައްމަދު އެވެ.

މި މުބާރާތުގައި ރާއްޖޭގެ ކުޅުންތެރިންނަށް ދެން ހުރި މެޗުތަކަށް ބަލާއިރު، ފިރިހެން ސިންގަލްސް އިވެންޓްގައި ޒަޔާން ޒަކީ އާއި ނިބާލް އަދި ހަސަން ޒަޔާންގެ މެޗާއި، އަންހެން ސިންގަލްސް ސެމީގައި ނަބާ އާއި ނަބީގެ މެޗުތަކާއި، ފިރިހެން ޑަބަލްސް ސެމީގައި ޒަޔާން ޒަކީ އާއި ނިބާލްގެ ޕެއާގެ މެޗު ހިމެނެއެވެ.

މީގެއިތުރުން، މުބާރާތުގެ މިކްސް ޑަބަލްސް ސެމީގައި ރާއްޖޭގެ ޒަޔާން ޒަކީ އާއި ނަބާގެ ޕެއާއާ ނިބާލްއާއި ނަބީ ބައްދަލުކުރާ މެޗު ވެސް ހިމެނެއެވެ.