ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ކަމަށް، ޤައުމީ ޓީމުގެ ކުރީގެ ފޯވާޑް، އަދި ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު، އަހުމަދު ޠާރިޤު (ޓޮމް) މިއަދު އިންތިހާބުކޮށްފިއެވެ.

މިއީ އެފްއޭއެމްގެ ރައީސްގެ މަގާމަށް ޠާރިޤު އިންތިހާބުވި ދެވަނަ ފަހަރެވެ. މީގެކުރީން، އޭނާ ވަނީ 2016 ވަނަ އަހަރު ވެސް އެފްއޭއެމްގެ ރައީސްގެ މަގާމު ފުރުއްވާފައެވެ.

ފީފާ އިން އައްޔަންކުރި ނޯމަލައިޒޭޝަން ކޮމިޓީގެ ބެލުމުގެ ދަށުން ބޭއްވުމަށް އެފްއޭއެމުން ތާވަލްކުރި އިންތިހާބުގައި ވާދަކުރުމަށް ޠާރިޤު ފިޔަވައި އެހެން ފަރާތެއް ވާދަނުކުރެއެވެ.

އެހެންކަމުން، މިއަދު ބޭއްވި އެފްއޭއެމްގެ އިންތިހާބީ ކޮންގްރެސްގައި ޠާރިޤު މަގާމަށް އިންތިހާބުކުރުމަށް ނެގީ ފެންނަ، ނުފެންނަ ވޯޓެއް ނަގައިގެންނެވެ. އެގޮތުން، މިއަދުގެ އިންތިހާބީ ކޮންގްރެސްގައި ޠާރިޤު ރައީސް ކަމަށް ހޮވުނީ އެފްއޭއެމްގެ ހުރިހާ މެންބަރު ކްލަބެއްގެ ވޯޓުންނެވެ.

މިއަދުގެ ކޮންގްރެސްގައި ޠާރިޤުގެ އެކްސްކޯ ވެސް ވަނީ އިންތިހާބުކޮށްފައެވެ. އޭނާގެ އެކްސްކޯގައި ހިމެނެނީ؛ ސީނިއާ ނައިބު ރައީސްގެ ގޮތުގައި، ހެންވޭރު ހުޅަނގު ދާއިރާގެ އިއްޒަތްތެރި މެންބަރު، އަދި ނިއުގެ ވައިސް ޗެއާމަން، އަލީ އިބްރާހިމް (ކައްޕި)ގެ އިތުރުން ނައިބު ރައީސުންގެ ގޮތުގައި މާޒިޔާ ސްޕޯޓްސް އެންޑް ރެކްރިއޭޝަންގެ ސީއީއޯ، ހުސައިން ޝާފިއު (ކޮކީ) އާއި ނިއުގެ ބޯޑް މެންބަރު އަދި ވެމްކޯގެ މެނޭޖިންގ ޑިރެކްޓަރު، މުޖުތަބާ ޖަލީލް އެވެ.

ޠާރިޤުގެ އެކްސްކޯގައި ދެން ހިމެނެނީ؛ ޤައުމީ ޓީމަށް ކުރީން ތާރިޤާއެކު ކުޅުނު، ގޯލްކީޕަރު، އިމްރާން މުޙައްމަދު އާއި މުޙައްމަދު އުމެއިރު، ޓީސީ ސްޕޯޓްސް ކްލަބުގެ އަހުމަދު އައްބާސް، އޮޑި ސްޕޯޓްސް ކްލަބުގެ ޢަބްދުﷲ ނާސިހު އަދި ބީޖީ ސްޕޯޓްސްގެ އަލީ ރިޒްވާން އެވެ. މީގެއިތުރުން، އަންހެން މެންބަރުންގެ ގޮތުގައި ހައްވާ ނަސްރާ ސައީދު އާއި ހައްވާ ރަޝީދާ ހިމެނެއެވެ.

ތާރިޤު އަތުން ކުރިން ފަހަރު އެފްއޭއެމްގެ ރައީސްކަން ގެއްލުނީ، 2016 ވަނަ އަހަރުގެ ސެޕްޓެންބަރު މަހުގެ ތެރޭގައި، އޭރުގެ އެކްސްކޯގެ ފަސް މެންބަރުން އިސްތިއުފާދިނުމާ ގުޅިގެން އަސާސީ ޤަވާއިދުގައި ބުނާ ގޮތަށް އިންތިހާބެއް ބާއްވަން ޖެހުމުންނެވެ. އެއަށްފަހު، ދެން ބޭއްވި އިންތިހާބުގައި ތާރިޤާ ވާދަކުރައްވައި، ކާމިޔާބުކުރީ، މިދިޔަ ދެ ދައުރު ރައީސްކަންކުރި ބައްސާމް އަދީލް ޖަލީލް އެވެ.