ENGLISH

30 އޯގަސްޓު 2025

Advertisement

ފުޓްބޯޅަ ސްކޫލަށް ޚާއްސަކުރި ބިން އަނބުރާ ދޭން އެފްއޭއެމުން އެދިއްޖެ

24 ޖުލައި 2025

|

މުޙައްމަދު އަދުހަމް

އެފްއޭއެމް ކުރިން ހިންގި އިމާރާތް. --ފޮޓޯ: މިހާރު

ހުޅުމާލޭގައި ފުޓްބޯޅަ ޓްރެއިނިންގ ފެސިލިޓީއެއް ޤާއިމުކުރުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ދޫކުރި ބިމުގެ ހެޑްލީސް ބާޠިލްކުރަން ނިންމުމުން، އެ ނިންމުން ބަދަލުކޮށްދިނުމަށް އެ އެސޯސިއޭޝަނުން މިއަދު އެދިއްޖެއެވެ.

އެފްއޭއެމްގެ ނޯމަލައިޒޭޝަން ކޮމިޓީން މިއަދު ނެރުނު ބަޔާނުގައިވާގޮތުން، އެޗްޑީސީން އެ އެއްބަސްވުން ބާޠިލްކުރީ، އެފްއޭއެމްގެ ފަރާތުން އެއްބަސްވުމާ އެއްގޮތަށް އަމަލުކޮށްފައިނުވުމުގެ އިތުރުން ދައްކަންޖެހޭ ކުލި ވެސް އެ ފަރާތަށް ދައްކާފައިނުވުމުން ކަމަށެވެ.

އެގޮތުން، އެފްއޭއެމް އިން ބުނީ، ދޫކުރެވުނު ބިމުގެ ތެރެއިން ގިނަ ޕްލޮޓްތަކެއް ކުރީގެ މެނޭޖްމަންޓުން އުސޫލުން ބޭރުން ސަބްލީސްކޮށް، އެއްބަސްވުމުގެ މުއްދަތަށް އެއްކޮށް، ނުވަތަ ދިގު މުއްދަތަކަށް ގަނޑުކޮށް އެޑްވާންސް ފައިސާ ނަގާފައިވީނަމަވެސް، އޭގެތެރެއިން ގިނަ އަދަދެއްގެ ފައިސާ އެފްއޭއެމްގެ އެކައުންޓަށް ވަދެފައިވާކަން ފެންނަން ނެތުމާއެކު، މާލީގޮތުން ހުރި ގޮންޖެހުންތަކާ ގުޅިގެން ކުލި ދެއްކޭގޮތް ނުވީ ކަމަށެވެ.

އެހެންކަމުން، އެއްބަސްވުންތައް ހެދިފައިވާ ގޮތާއި، ފައިސާއަށްވެފައިވާ ގޮތް އޮޅުންފިލުވުމަށްޓަކައި ތަފްޞީލީ އޮޑިޓެއް ހަދަންޖެހޭ ކަމަށް ވެސް އެފްއޭއެމުން ވަނީ ބުނެފައެވެ.

"ގްރޭޓަރ މާލެ ސަރަހައްދުގެ އާބާދީ އިތުރުވަމުންދާ މިންވަރަށް ބަލާއިރު، އަދި ޖާގައިގެ ދަތިކަން ހުރިގޮތުން، ފުޓްބޯޅައިގެ ބޭނުމަށް ދޫކޮށްފައިވާ މިފަދަ ބިމެއް ގެއްލިގެން ދިއުމަކީ ދިވެހި ފުޓްބޯޅައަށް ލިބޭ ވަރަށް ބޮޑު ގެއްލުމަކަށްވާތީ އެކަމާމެދު ނޯމަލައިޒޭޝަން ކޮމިޓީން ކަންބޮޑުވުން ފާހަގަކުރަން،" - އެފްއޭއެމުން ނެރުނު ބަޔާނުގައިވެއެވެ.

އެފްއޭއެމުން ވަނީ، އެ ބިމަކީ ވިޔަފާރީގެ ބޭނުމަށް ދޫކޮށްފައިވާ ބިމަކަށް ނުވެފައި، އެއީ ފުޓްބޯޅައިގެ ބޭނުމަށް އިޖުތިމާޢީ ގޮތުން މުހިއްމުކަމެއްގެ ގޮތުގައި ދެކިގެން ދޫކޮށްފައިވާ ބިމެއް ކަމަށް ވާތީވެ، އެ ބިމުގެ ހެޑްލީސް އަލުން އިޢާދަކޮށްދިނުމަށް އެދިފައެވެ.

މި ބިންތައް ކުއްޔަށް ދޫކުރި ދުވަސްވަރު އެފްއޭއެމްގެ ރައީސް ކަމުގައި ހުންނެވީ ބައްސާމް އަދީލް ޖަލީލެވެ. މިދިޔަ އަހަރުގެ ޖޫން މަހު ފީފާގެ މިނިވަން އެތިކްސް ކޮމިޓީން ވަނީ ކޮރަޕްޝަންގެ ތުހުމަތުތަކެއްގައި، ނުވަ މަސް ދުވަހަށް ބައްސާމް ސަސްޕެންޑްކޮށްފައެވެ. މީގެއިތުރުން، ބައްސާމްގެ މައްޗަށް ރާއްޖޭ ކޯޓުތަކުގައި ޚިޔާނާތާއި މަނީ ލޯންޑަރިންގެ މައްސަލަތަކެއްގެ ތުހުމަތުކޮށް، ވަނީ ދައުވާ އުފުލާފައެވެ.

ކިޔުންތެރިންގެ ހިޔާލު