މިހާރު ސްވިޒަލެންޑްގައި ކުރިއަށްދާ ޔުއެފާ ވިމެންސް ޔޫރަޕިއަން ޗެމްޕިއަންޝިޕްގެ ފައިނަލުގައި އެންމެ ފަހުގެ ޗެމްޕިއަން، އިންގްލެންޑާއި ސްޕެއިން ބައްދަލުކުރާން ޖެހިއްޖެއެވެ.

މި ދެ ޓީމަކީ އެންމެ ފަހުން 2023 ވަނަ އަހަރު ބޭއްވީ ފީފާ ވިމެންސް ވޯލްޑް ކަޕްގެ ފައިނަލުގައި ކުޅުނު ދެ ޓީމެވެ. އެ ފަހަރު މޮޅުވީ ސްޕެއިނެވެ.

މުބާރާތުގެ ފައިނަލަށް ސްޕެއިން ދަތުރުކުރީ، ރޭ ކުޅުނު ސެމީ ފައިނަލްގެ ދެވަނަ މެޗުގައި އިތުރުވަގުތުގެ ކުޅުމަށްފަހު ޖަރުމަންގެ މައްޗަށް 1-0 އިން ކުރިހޯދައިގެންނެވެ.

ސްވިޒަލެންޑްގެ ޒިއުރިކްގައި ކުޅުނު މެޗުގައި ފެނިގެންދިޔަ ހަމައެކަނި ލަނޑު، 113 ވަނަ މިނެޓުގައި ސްޕެއިނަށް ކާމިޔާބުކޮށްދިނީ ބެލޮންޑިއޯ އެވޯޑް ދެ ފަހަރު ހާސިލްކޮށްފައިވާ، އައިޓާނާ ބޮންމާޓީ އެވެ.

މި މުބާރާތުގެ ފައިނަލުން އިންގްލެންޑް ޖާގަ ހޯދީ، ސެމީގެ ފުރަތަމަ މެޗުގައި އިތުރުވަގުތުގެ ކުޅުމަށްފަހު 2-1 އިން އިޓަލީ ބަލިކޮށްގެންނެވެ.

އެންމެ ފަހުގެ ދުނިޔޭގެ ޗެމްޕިއަން، ސްޕެއިނާއި ޔޫރަޕްގެ ޗެމްޕިއަން، އިންގްލެންޑް ބައްދަލުކުރާ ފައިނަލް މެޗު އޮތީ މި މަހުގެ 27 ވާ އާދީއްތަ ދުވަހު އެވެ. މި މެޗު ކުޅުމަށް ހަމަޖެހިފައިވަނީ ސްވިޒަލެންޑްގެ ބަސެލްގައި ހުންނަ ސެއިންޓް ޖޭކޮބް ޕާކް ސްޓޭޑިއަމް ގައެވެ.