ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ޗެމްޕިއަންސް ލީގުގެ ފައިނަލުގައި ރޭ ކިރްގިސްތާންގެ ބިޝްކެކް ބަލިކޮށް، ކަޒަކިސްތާންގެ ޒައިކް ވީސީ ޗެމްޕިއަންކަން ހޯދައިފިއެވެ.

ކަޒަކިސްތާންގެ ޒައިކް ވީސީ އިން ވަނީ، 3-1 ސެޓުން ކިރްގިސްތާންގެ ބިޝްކެކް ބަލިކޮށްފައެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މެޗުގެ ފުރަތަމަ ސެޓު ވާދަވެރި ކުޅުމަކަށްފަހު ޒައިކް ވީސީ 26-24 އިން ކުރިހޯދިއިރު، ދެވަނަ ސެޓު ވެސް އެ ޓީމު ވަނީ 25-21 އިން ކާމިޔާބުކޮށްފައެވެ.

އެހެންނަމަވެސް، ދެން ޖެހިގެންއައި ތިންވަނަ ސެޓު 25-20 އިން ކާމިޔާބުކޮށް، ބިޝްކެކުން މެޗުތެރެއަށް ވަންނަން މަސައްކަތްކުރިއެވެ. އެކަމަކު، ޒައިކް ވީސީ އިން އެ ޓީމަށް އިތުރު ފުރުޞަތެއްނުދީ ހަތަރުވަނަ ސެޓުގައި 25-22 އިން ކުރިހޯދައި، މެޗު ކާމިޔާބުކޮށްފައެވެ.

ފައިނަލް މެޗަށްފަހު މުބާރާތުގެ ވަނަތަކަށް ހޮވުނު ފަރާތްތަކަށް ތަށްޓާއި، މެޑެއްޔާއި ސެޓްފިކެޓް ހަވާލުކޮށްދެއްވީ މަތީ ތަޢުލީމާ މަސައްކަތްތެރިކަމާއި ހުނަރުތައް ތަރައްޤީ ކުރުމާ ބެހޭ ވަޒީރު، ޑރ. އަލީ ހައިދަރުގެ އިތުރުން ސްޕޯޓްސް ކޮމިޝަނަރ މުޙައްމަދު ޠަލާލް އެވެ.

މުޅި މުބާރާތުގެ އެންމެ މޮޅު ކުޅުންތެރިޔާގެ އިތުރުން އެންމެ މޮޅު އޮޕޮސިޓް ޕްލެޔަރަކަށް ހޮވުނީ ޒައިކް ވީސީގެ ވިޓަލީ އެރްޑްޝްޓެއިން އެވެ.

މުބާރާތުގެ އިތުރު ވަނަތަކަށް ހޮވުނު ކުޅުންތެރިންނަށް ބަލާއިރު، އެންމެ މޮޅު އައުޓްސައިޑް ހިޓާ އަކަށް ހެލްޕް ނޭޕާލް ސްޕޯޓްސް ކްލަބުގެ މުރާދު ޖެހާން އާއި ޒައިކްގެ އޮމުރްބެކް ޒުނޫސޮވް ހޮވުނުއިރު، އެންމެ މޮޅު މިޑްލް ބްލޮކަރުންނަށް ހޮވުނީ ޒައިކްގެ ޕްރޮކޯފިން ވްލަޑިމިއާ އާއި ބިޝްކެކްގެ ނުރިސްލާމް މެޑެޓްބެކް އުލޫ އެވެ.

މުބާރާތުގެ އެންމެ މޮޅު ސެޓަރަކަށް ޒައިކްގެ ވޮލޮޑިމީރް ކޮވަލްޗުކް ހޮވުނުއިރު، އެންމެ މޮޅު ލިބަރޯ އަކީ ހެލްޕް ނޭޕާލް ސްޕޯޓްސް ކްލަބުގެ ސަންތޯޝް ރާއީ އެވެ.

މި މުބާރާތުގެ ތިންވަނަ ހޮވުމަށް ކުޅުނު މެޗުގައި އިއްޔެ ހަވީރު ސްރީ ލަންކާގެ ޕޯޓްސް އޮތޯރިޓީ ޓީމު ބަލިކޮށް، ނޭޕާލްގެ ހެލްޕް ނޭޕާލް ސްޕޯޓްސް ކްލަބުން ވަނީ ބްރޯންޒް މެޑެލް ހާސިލްކޮށްފައެވެ.

މި މެޗުން ހެލްޕް ނޭޕާލް ޓީމު މޮޅުވީ 3-1 ސެޓުންނެވެ. މެޗުގެ ސެޓުތައް ހެލްޕް ނޭޕާލް ޓީމުން ގެންދިޔައީ، 25-20، 25-15، އާއި، 25-20، އަދި 25-21 އިންނެވެ.