މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ޗެމްޕިއަންސް ލީގުގައި މިއަދު ހަވީރު ކުޅުނު މެޗުގައި ރާއްޖޭގެ ދެ ޓީމުގެ ކުރިމަތިލުމުގައި ކްލަބް އެޗްޑީސީ ބަލިކޮށް، ދިވެހި ސިފައިންގެ ކްލަބުން މުބާރާތުގެ ފަސްވަނަ މަގާމު ހޯދައިފިއެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މެޗުން ވާދަވެރި ކުޅުމަކަށްފަހު ސިފައިން މޮޅުވީ 3-2 ސެޓުންނެވެ.

މި މެޗުގެ ފުރަތަމަ ސެޓުގައި 25-22 އިން ސިފައިން ކުރިހޯދާފައިވަނިކޮށް، އެޗްޑީސީ އިން ވަނީ ދެން ޖެހިގެންއައި ދެވަނަ ސެޓު 25-23 އިން ކާމިޔާބުކޮށްފައެވެ. އެއަށްފަހު، ދެން ކުޅުނު ސެޓުގައި އަނެއްކާވެސް 25-19 އިން ސިފައިން ކާމިޔާބުކޮށްފައިވަނިކޮށް، އެޗްޑީސީން ވަނީ ދެން ކުޅުނު ހަތަރުވަނަ ސެޓުން 25-19 އިން ކުރިހޯދައި، އިތުރު ސެޓަކަށް މެޗު ދިގުދަންމާލައިފައެވެ.

މެޗުގެ ފަސްވަނަ ސެޓުގައި ވާދަވެރި ކުޅުމަކަށްފަހު ސިފައިން މޮޅުވީ 16-14 އިންނެވެ.

މުބާރާތުގައި ސިފައިންނާ އެޗްޑީސީ ބައްދަލުކުރި މެޗުގެ ތެރެއިން. --ފޮޓޯ: ކާވާ

މި ނަތީޖާއާއެކު، ސިފައިންނަށް ރޭންކިންގެ ފަސްވަނަ ލިބުނުއިރު، އެޗްޑީސީ ނިންމާލީ ހަވަނައިގައެވެ.

މި މުބާރާތުގެ ފައިނަލަށް ދަތުރުކުރީ ލީގު ބުރަށްފަހު އެންމެ ކުރިހޯދީ ދެ ޓީމު ކަމަށްވާ، ކަޒަކިސްތާންގެ ޒައިކް ވީސީ އާއި ކިރްގިސްތާންގެ ބިޝްކެކެވެ. މި ދެ ޓީމުގެ މެދުގައި ކުޅުމަށް ހަމަޖެހިފައިވާ ފައިނަލް މެޗު އޮތީ މާދަމާ ރެ އެވެ. މި މެޗު ފަށާނީ ރާއްޖޭގަޑިން ރޭގަނޑު 8:30 ގައެވެ.

މުބާރާތުގެ ތިންވަނަ ހޮވާ މެޗުގައި ނޭޕާލްގެ ހެލްޕް ނޭޕާލް ސްޕޯޓްސް ކްލަބު ބައްދަލުކުރާނީ ސްރީ ލަންކާގެ ޕޯޓްސް އޮތޯރިޓީ ޓީމާ އެވެ. މި މެޗު ކުޅުމަށް ހަމަޖެހިފައިވަނީ މާދަމާ ހަވީރު 4:15 ގައެވެ.