ENGLISH
30 އޯގަސްޓު 2025
ފުޖިއާން ޕްރޮވިންސުން ރާއްޖެ އަށް ކުޅިވަރު ސާމާނު ހަދިޔާކޮށްފި
20 ޖުލައި 2025
|
ފުޖިއާން ޕްރޮވިންސުން ރާއްޖެ އަށް ކުޅިވަރު ސާމާނު ހަދިޔާކުރުމަށް ބޭއްވި ރަސްމިއްޔާތުގެ ތެރެއިން. ފޮޓޯ: ކުޅިވަރާއި ހަށިހެޔޮކަމާ ބެހޭ ވުޒާރާ
ޕީޕަލްސް ރިޕަބްލިކް އޮފް ޗައިނާގެ ފުޖިއާން ޕްރޮވިންސުން ކުޅިވަރު ސާމާނު ހަދިޔާކުރުމުގެ އެއްބަސްވުމެއްގައި ދިވެހިރާއްޖޭގެ ކުޅިވަރާއި ހަށިހެޔޮކަމާ ބެހޭ ވުޒާރާ އާއެކު ސޮއިކޮށްފިއެވެ.
މިއަދު ބާސެލޯ ނަސަންދުރައިގައި ބޭއްވި ހާއްސަ ރަސްމިއްޔާތެއްގައި ރާއްޖޭގެ ފަރާތުން މި އެއްބަސްވުމުގައި ސޮއިކުރެއްވީ، ކުޅިވަރާ ބެހޭ ވަޒީރު، ޢަބްދުﷲ ރާފިޢު އެވެ. އަދި، ޗައިނާގެ ފުޖިއާން ޕްރޮވިންސްގެ ފަރާތުން ސޮއިކުރެއްވީ، ވައިސް ގަވަރުނަރު އޮފް ފުޖިއާން ޕްރޮވިންސް، ވެއި ޝިއައޮކުއި އެވެ.
މި ރަސްމިއްޔާތުގައި ވާހަކަ ދައްކަވަމުން ފުޖިއާން ޕްރޮވިންސްގެ ވައިސް ގަވަރުނަރު ވިދާޅުވީ، ރާއްޖެ އަށް ކުޅިވަރުގެ ދާއިރާއިން އެހީތެރިކަން ފޯރުކޮށްދިނުމުގެ ތެރެއިން ކުޅިވަރު ސާމާނު ހަދިޔާކުރުމުގެ އިތުރުން މީހުން ބިނާކުރުމުގައިވެސް ހާއްސަ އިސްކަމެއް ދެއްވާނެ ކަމަށެވެ.
ކުޅިވަރު ވަޒީރު ރާފިޢު ވަނީ، ޗައިނާގެ ފުޖިއާން ޕްރޮވިންސުން ރާއްޖެ އަށް ވެދެއްވަމުން އަންނަ އެހީތެރިކަން ފާހަގަކުރައްވާ ޝުކުރު އަދާކުރައްވާފައެވެ. އަދި، ރާއްޖެ އަށް ކުޅިވަރު ސާމާނު ހަދިޔާކުރުމުގެ އިތުރުން ޗައިނާގެ އެހީތެރިކަމާއެކު ވޮލީބޯޅަ ކޯޗުން ތަމްރީންކޮށްދެއްވާފައިވާކަން ފާހަގަކުރެއްވިއެވެ.
މިއަދު ބޭއްވި ރަސްމިއްޔާތުގައި ކުޅިވަރު ވަޒީރު ރާފިޢު ވާހަކަ ދައްކަވަނީ. ފޮޓޯ: ކުޅިވަރާއި ހަށިހެޔޮކަމާ ބެހޭ ވުޒާރާ
މީގެއިތުރުން، ބާސްކެޓްބޯޅަ ކޯޗުންނާއި ކުޅުންތެރިން ތަމްރީންކުރުމުގައި ވެދެއްވަމުން އަންނަ އެހީތެރިކަމުގެ އިތުރުން ސްޕޯޓްސް މެޑިސިންގެ ދާއިރާއިން ދިވެހިން ބިނާކުރުމުގައި ޗައިނާ ސަރުކާރުން އަދާކުރަމުން އަންނަ މުހިއްމު ދައުރު ފާހަގަކުރައްވާ، އެ ޤައުމުގެ ސަރުކާރުން ދެއްވާފައިވާ ފުރުޞަތުތައް ވެސް ފާހަގަކުރައްވާ ވަޒީރު ވަނީ ޝުކުރު އަދާކުރައްވާފައެވެ.
ފުޖިއާން ޕްރޮވިންސުން ރާއްޖެ އަށް ހަދިޔާކުރި ކުޅިވަރު ސާމާނުގެ ތެރޭގައި؛ ޓޭބަލް ޓެނިސް މޭޒާއި، ޖޯޒީގެ އިތުރުން އަދިވެސް އެހެނިހެން ކުޅިވަރު ސާމާނު ހިމެނެއެވެ.
ޗައިނާ ސަރުކާރުން މީގެކުރީން، މިއަހަރު ކުރީކޮޅު ވަނީ ރާއްޖެ އަށް ކުޅިވަރުގެ ބައެއް ސާމާނުތައް ހަދިޔާކޮށްފައެވެ. އެފަހަރު ހަދިޔާކުރީ، އެތުލެޓިކްސްގެ އިތުރުން ޓޭބަލް ޓެނިސް އަދި ފުޓްބޯޅައާ ގުޅުންހުރި ސާމާނެވެ.
އޭގެކުރީން، މިދިޔަ ފެބުރުއަރީ މަހުގެ ތެރޭގައި ރާއްޖެ އާއި ޗައިނާއާ ދެމެދުގައި ވަނީ، އެމްއޯޔޫއެއްގައި ސޮއިކޮށް، ރާއްޖޭގެ ކުޅިވަރު ތަރައްޤީ ކުރުމުގެ އިތުރުން ދެ ޤައުމުގެ މެދުގައި އޮތް ޒަމާންވީ ރަހުމަތްތެރިކަމުގެ ގުޅުން ބަދަހިކުރުމާ ގުޅޭގޮތުން މުހިއްމު މަސައްކަތްތަކެއް ފަށައިފައެވެ.