ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ގެ ފިރިހެން ޑިވިޝަނުގެ ޗެމްޕިއަންސް ލީގުގައި މިއަދު ކުޅުނު މެޗުގައި ކިރްގިސްތާންގެ ބިޝްކެކް އަތުން ރާއްޖޭގެ ކްލަބް އެޗްޑީސީ ބަލިވެއްޖެއެވެ.

ޒުވާނުންގެ މަރުކަޒު އެތެރޭ ކޯޓުގައި މިއަދު ހަވީރު ކުޅުނު މެޗުގައި ވާދަވެރި ކުޅުމެއް ފެނިގެންދިޔައިރު، ބިޝްކެކް ކުރިހޯދީ ސީދާ ތިން ސެޓުންނެވެ.

ކިރްގިސްތާންގެ ޤައުމީ ޓީމުގެ ގިނަ ކުޅުންތެރިންތަކެއް ކުޅެމުންއަންނަ ބިޝްކެކްއާ ދެކޮޅަށް ރާއްޖޭގެ އެޗްޑީސީން ވަނީ ތިން ސެޓުގައި ވެސް ރަނގަޅު ކުޅުމެއް ދައްކާފައެވެ.

މި މެޗުގެ ސެޓުތައް ބިޝްކެކުން ކާމިޔާބުކުރީ 27-25، 26-24، އަދި 25-20 އިންނެވެ.

މި މުބާރާތުގައި މިއަދު ކުޅުނު ފުރަތަމަ މެޗުގައި ކަޒަކިސްތާންގެ ޒައިކް ވީސީ ވަނީ ފަހަތުންއަރައި 3-1 ސެޓުން ސްރީ ލަންކާގެ ޕޯޓްސް އޮތޯރިޓީ ޓީމު ބަލިކޮށްފައެވެ. މި މެޗުގެ ސެޓުތައް ޒައިކް ވީސީ ގެންދިޔައީ، 22-25، 25-14، އާއި 25-16، އަދި 25-15 އިންނެވެ.

މުޅިއެކު ހަ ޓީމު ވާދަކުރާ މުބާރާތުގެ ކުޅުން ކުރިއަށްދާނީ މި މަހުގެ 17 އިން 23 ގެ ނިޔަލަށެވެ.

މި މުބާރާތުގައި ވާދަކުރާ ޓީމުތަކަކީ؛ ރާއްޖޭގެ އެންމެ ވަރުގަދަ ދެ ޓީމު ކަމަށްވާ، އެޗްޑީސީ އާއި ދިވެހި ސިފައިންގެ ކްލަބުގެ އިތުރުން ކިރްގިސްތާންގެ ބިޝްކެކް، ނޭޕާލްގެ ހެލްޕް ނޭޕާލް ސްޕޯޓްސް ކްލަބާއި، ލަންކާގެ ޕޯޓްސް އޮތޯރިޓީ އަދި ކަޒަކިސްތާންގެ ޒައިކް އެވެ.