ކ. ހުރާ ސިއްހީ މަރުކަޒުގެ އައު އިމާރާތުގެ ތަނބުތަކުގެ ރިންގު އެޅުމުގެ މަސައްކަތް ކުރަމުން އަންނަ ކަމަށް  މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނެފިއެވެ.

އެމްޓީސީސީން މައުލޫމާތު ދިން ގޮތުގައި މި އިމާރާތުގެ ތަނބުތަކުގެ ކޮންކްރީޓް އެޅުމުގެ މަސައްކަތް މި މަހުގެ 18 ދުވަހުގައި ކުރުމަށް މިހާރު ވަނީ ތާވަލުކުރެވިފައެވެ.

މި އިމާާރާތުގެ ޓައި ބީމްތަކުގެ ކޮންކްރީޓް އެޅުމުގެ މަސައްކަތްތައް މިދަޔަ މަހު ކޮށްފައިވެއެވެ. 

ހުރާގައި އަލަށް ގާއިމްކުރާ ސިއްހީ މަރުކަޒުގެ މަސައްކަތް ކުރިއަށްދަނީ - ފޮޓޯ: އެމްޓީސީސީ

މި މަޝްރޫޢުގެ ދަށުން 15,650 އަކަފޫޓުގެ ސަރަހައްދެއްގައި 2 ފަންގިފިލާގެ އިމާރާތެއްގައި 16 އެނދުގެ ޞިއްޙީ ޚިދުމަތްދޭ މަރުކަޒެއް ހަދާނެއެވެ.

ހުރާ ކައުންސިލް އިން ބުނީ، މި އިމާރާތުގެ ކޮންމެ ފަންގިފިލާއެއްގައި 7825 އަކަފޫޓު ހުންނާނެ ކަމަށެވެ. މި މަޝްރޫއުގު ދަށުން ބިންގަނޑު އެއްވަރުކުރުމުގެ މަސައްކަތާއި، ކޮންކްރީޓް މަސައްކަތާއި، މޭސަނަރީ މަސައްކަތާއި، ޓައިލްސް ޖެހުމުގެ މަސައްކަތާއި، ދޮރާއި ކުޑަދޮރު ހަރުކުރުމުގެ މަސައްކަތާއި، ދަވާދު ލުމާއި، ހައިޑްރޯލިކްސް އަދި ޑްރޭއިނޭޖްގެ މަސައްކަތާއި، ކަރަންޓު ވަޔަރުކުރުމާއި، މެޑިކަލް ގޭސް ސިސްޓަމެއް ބެހެއްޓުމާއި، އެއަރ ކޮންޑިޝަން ހަރުކުރުމާއި، އަލިފާން ނިއްވުމުގެ މަސައްކަތް ހިމެނެއެވެ.

މި މަޝްރޫއު އެމްޓީސީސީއާ ހަވާލުކޮށްފައިވަނީ 360 ދުވަސްތެރޭގައި ނިންމާ ގޮތަށް 27.23 މިލިއަން ރުފިޔާ އަށެވެ.