ރާއްޖޭގެ އިންސްޓަންޓް ޕޭމަންޓް ސިސްޓަމް، ފަވަރަ އާއި ޔުނިފައިޑް ޕޭމަންޓްސް އިންޓަފޭސް (ޔޫޕީއައި) ގުޅާލުން ޓެސްޓުކުރަން މިމަހު ފަށާނެކަމަށް މަރުކަޒީ ބޭންކް -- އެމްއެމްއޭއިން ބުނެފިއެވެ. 

ފަވަރަ އާއި ޔޫޕީއައި ގުޅުވާލުމުގެ އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ޖުލައިމަހުއެވެ. މި އެއްބަސްވުމުގެ މަގުސަދަކީ ރާއްޖޭގެ ޕޭމަންޓް އިންފްރާސްޓްރަކްޗާ ތަރައްގީކޮށް ރާއްޖޭގެ މާލީ ނިޒާމް އިތުރަށް ހަރުދަނާ ކުރުމެވެ. 

އެމްއެމްއޭއިން ބުނީ ފަވަރައާއި ޔޫޕީއައި ގުޅުވާލުމަށްޓަކައި ޓެސްޓިން މަރުހަލާ ފެށުމުގެ މަސައްކަތް މިހާރު ކުރަމުންދާކަމަށެވެ. މި މަސައްކަތް ކުރިއަށްގެންދިއުމަށް ނިންމާފައިވނީ ދެ މަރުހަލާއަކަށް ބަހާލައިގެންނެވެ. 

އެމްއެމްއޭއިން ދަނީ  ނޭޝަނަލް ކިއުއާރު ކޯޑް ސްޓޭންޑަޑެއް އެކުލަވާލުމުގެ މަސައްކަތްވެސް ކުރަމުންނެވެ.

މި ސްޓޭންޑަޑް އެކުލަވާލުމުގެ މަގުސަދަކީ ބޭންކްތަކާއި ޕޭމަންޓް ހިދުމަތްދޭ ހުރިހާ ފަރާތްތަކުން ބޭނުންކުރާ ކިއުއާރު ކޯޑުތަކަކީ އެއް ހަމައެއްގެ މައްޗަށް ހެދިފައިވާ ކިއުއާރު ކޯޑު ތަކަކަކަށް ހެދުމެވެ.