ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ މޭޔަރުކަމުގައި ސިޓީ ކައުންސިލުން ފެށި ގިނަ މަސައްކަަތްތަކެއް މިހާރު ހުއްޓިފައި ހުރިކަން ފާހަގަކުރައްވަމުން، އެމަސައްކަތްތައް ކުރިއަށްގެންގޮސް ނިންމައިލުމަށްޓަކައި މާލެ ސިޓީގެ މޭޔަރުކަމަށް ޕީޕަލްސް ނޭޝަނަލް ކޮންގުރެސް ޕާޓީގެ ކެންޑިޑޭޓު މޫސާ އަލީ ޖަލީލު ހޮވަންޖެހޭކަމަށް އެ ޕާޓީގެ ޕާލިމަންޓަރީ ގުރޫޕުގެ ލީޑަރު އިބްރާހީމް ފަލާހު ވިދާޅުވެއްޖެއެވެ. 

ކުރިއަށް އޮތް ލޯކަލް ކައުންސިލު އިންތިހާބުގައި ކޮންގުރެސް ޕާޓީގެ ކެމްޕެއިން މެނޭޖަރުކަންވެސް ކުރައްވަމުންގެންދަވާ ފަލާހު މިފަދައިން ވިދާޅުވީ މާފަންނު ދެކުނު ދާއިރާގެ ކައުންސިލު ގޮނޑިއަށް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އެ ދާއިރާގެ ގޮނޑިއަށް ވާދަކުރައްވާ ކެންޑިޑޭޓުންގެ ކެމްޕެއިން ޖަގަހަ ހުޅުވުމުގެ ރަސްމިއްޔާތުގައި ދެއްކެވި ވާހަކަފުޅުގައެވެ. 

ފަލާހު ވިދާޅުވީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވެސް މީގެ ކުރިން ފާހަގަކުރެއްވި ފަދައިން ކައުންސިލަރުން އިންތިހާބުކުރަނީ ސަރުކާރު ޖަވާބުދާރީކުރުވަން ނޫން ކަމަށެވެ. އޭނާ ވިދާޅުވީ ކައުންސިލަރުން އިންތިހާބުކުރަނީ ސަރުކާރުން ހިންގާ މަޝްރޫއުތަކާއި ފޯރުކޮށްދޭ ހިދުމަތްތަކާއި ކުރަމުންދާ އެހެނިހެން މަސައްކަތްތައް ރައްޔިތުންނާ ވީހާވެސް ގާތުން ކުރިއަށްގެންދިއުމުގައި އެހީތެރިވުމަށް ކަމަށެވެ. 

މާލެ ސިޓީގެ މޭޔަރުކަމުގައި ރައީސް ޑރ.މުޢިއްޒު ހުންނެވިއިރު މާލޭގައި އީދު ފާހަގަކުރަނީ ވަރަށް ފުރިހަމައަށް ކަމަށާއި، އަދި މާލެ ޒީނަތްތެރިކުރުމަށް ކަނދުރު ރުއްތައް އިންދައި، މާލޭގައި ޕާކުތަކާއި މައިޒާންތައް ގާއިމުކޮށް، ފުރިހަމަ އިންތިޒާމެއްގެ ތެރެއިން ގިނަ ހިދުމަތްތަކެއް ދެމުން އައި ކަމަށް ފަލާހު ވިދާޅުވިއެވެ. 

"އެހެންނަމަވެސް އެ ހިދުމަތް މެދުކެނޑިފައި އޮތްކަން މާލޭ ރައްޔިތުން ގަބޫލުކުރޭ މިއަދު. އެ ސަބަބަށްޓަކައި އެމަނިކުފާނު ފައްޓަވާފައި މިހިރަ މަސައްކަތްޕުޅުތައް، ސަރުކާރުގެ ސިޔާސަތުުތައް، މާލޭ ސިޓީ މޭޔަރުކަމުގައި އެމަނިކުފާނު ކުރިއަށްގެންދަވަން ރޭއްވެވި ކަންކަން ކުރިއަށްގެންދިއުމަށް މޫސާ އަލީ ޖަލީލު އިންތިހާބުކުރަންވީ. އަދި ޕީއެންސީން މާލޭ ސިޓީ ކައުންސިލަށް ވާދަކުރައްވާ ހުރިހާ ކެންޑިޑޭޓުން ހޮވަންވީ،" ފަލާހު ވިދާޅުވިއެވެ. 

ފަލާހު އިތުރަށް ފާހަގަކުރެއްވީ ރައީސް ޑރ.މުއިއްޒަކީ ރާއްޖޭގެ ކުރީގެ ވެރިންނަށް ހައްލުކުރައްވަން ކެރިވަޑައިނުގެން ދޫކޮށްލައްވާފައި ހުރި އެތައް މައްސަލައެއް ހައްލުކުރައްވަމުންގެންދަވާ ވެރިއެއް ކަމެވެ. އެގޮތުން ނުރައްކާ ދަރަޖައެއްގައި އޮތް ވޭޕުގެ މައްސަލަ ފަދަ އެތައްކަމެއް ރައީސް ހައްލުކޮށްދެއްވާފައިވާކަމަަށް ފަލާހު ވިދާޅުވިއެވެ. އަދި މިހާރުވެސް އެފަދަ އެތައް މައްސަލައެއް ހައްލުކުރައްވަން މަސައްކަތްކުރައްވާކަން ފާހަގަކުރެއްވިއެވެ. 

އޭނާ ވިދާޅުވި ގޮތުގައި މިފަދައިން މަސައްކަތްކުރައްވާ ރައީސަކަށް އެހީތެރިވެ، މަދަދުވެރިވާނެ ކައުންސިލަރުންތަކެއް އިންތިހާބުކުރުމަކީ ރައްޔިތުންނަށް އެކަމުން ފައިދާވާނެ މުސްތަގުބަލުގައި ގިނަގުނަ މަންފާ ލިބޭނެ ކަމެކެވެ.