ދެކުނު އޭޝިއާގެ ޤައުމުތަކަށް އަމާޒުކޮށްގެން ބޭއްވީ ފުރަތަމަ ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަނުގެ ޗެމްޕިއަންކަން ހާސިލްކޮށް، ރާއްޖޭން އެ މުބާރާތުގެ ޝަރަފުވެރި ޓްރޮފީ އުފުލާލައިފިއެވެ.

މި މުބާރާތުގެ ލީގު ޗެމްޕިއަންކަން ރާއްޖޭން ކަށަވަރުކުރީ ބާކީ އެއް މެޗު އޮއްވައެވެ. ރާއްޖޭން ވަނީ މުބާރާތުގައި ކުޅުނު ހަ މެޗުވެސް ކާމިޔާބުކޮށްފައެވެ.

ލީގުގެ އެއްވަނަ ރާއްޖޭން ހޯދީ ހަ މެޗުން ސައްތައިން ސައްތައިގެ ރެކޯޑަކާއެކު 18 ޕޮއިންޓް ހަމަކޮށްގެންނެވެ. ދެވަނައިގައި އޮތް އިންޑިއާ އާއި ތިންވަނައިގައި އުޅޭ ނޭޕާލަށް ލިބުނީ 11 ޕޮއިންޓެވެ. އިންޑިއާ އަށް ކުރިލިބެނީ ގޯލްގެ ތަފާތުންނެވެ. ހަތަރުވަނަ އަށް ދިޔައީ 10 ޕޮއިންޓާއެކު ޕާކިސްތާނެވެ. ފަސްވަނައިގައި އޮތް ބަންގްލަދޭޝް އަށް ހަތް ޕޮއިންޓް ލިބިފައިވާއިރު، ހަވަނައިގައި އުޅޭ ސްރީ ލަންކާގެ އިތުރުން އެންމެ ފުލުގައި އޮތް ބޫޓާނަށް ލިބުނީ އެއް ޕޮއިންޓެވެ.

މުބާރާތުގެ ފުރަތަމަ މެޗުގައި ޕާކިސްތާން އަތުން 7-1 އިން ރާއްޖެ މޮޅުވިއިރު، ބަންގްލަދޭޝް އަތުން މޮޅުވީ 6-1 އިންނެވެ. އިންޑިއާ 5-0 އިން ބަލިކުރިއިރު، ނޭޕާލް އަތުން މޮޅުވީ 2-1 އިންނެވެ. އެއަށްފަހު، ބޫޓާންގެ މައްޗަށް ކުރިހޯދީ 3-1 އިންނެވެ. ފަހު މެޗުގައި ލަންކާ އަތުން މޮޅުވީ 5-2 އިންނެވެ.

މި މުބާރާތުގައި ދެކުނު އޭޝިއާގެ ހަތް ގައުމަކުން ވާދަކުރިއެވެ. އެއީ، ރާއްޖޭގެ އިތުރުން ބަންގްލަދޭޝް، ބޫޓާން، އިންޑިއާ، ނޭޕާލް، ޕާކިސްތާން އަދި ސްރީ ލަންކާއެވެ.

މުބާރާތުގެ އަންހެން ޑިވިޝަނުގެ ލީގު ޗެމްޕިއަންކަން ހޯދީ ބަންގްލަދޭޝް އެވެ.